Díli, 11 Agostu 2026 – Institutu Nasional Siénsia no Teknolojia (INCT, sigla iha Portugés), liu husi Prezidente Konsellu Ezekutivu INCT, Dr. José Cornélio Guterres, hamutuk ho Vise-Prezidente I Konsellu Ezekutivu INCT, Dr. Valentim Ximenes no Vise-Prezidente II Konsellu Ezekutivu INCT, Dr. Augusto da Conceição Soares, hala’o enkontru ho Investigador Prinsipal no ekipa investigador sira, ba projetu peskiza sientífika, ho títulu: “Governação Integrada para a Segurança Alimentar Sustentável e o Reforço do Desenvolvimento Económico nas Zonas Fronteiriças entre a Indonésia e Timor-Leste”, iha salaun INCT, Balide, Díli, Timor-Leste.
Objetivu prinsipal husi enkontru ne’e mak, atu diskute no analiza prosesu implementasaun peskiza, inklui área no lokalizasaun, ne’ebé sei sai fatin ba rekolla no análiza dadus. Aleinde ne’e, enkontru nemos, fó oportunidade atu halo kordenasaun kona-bá: etapa sira, iha implementasaun projetu no kontinua prosesu asina termu kontratu ba investigador sira.
Peskiza ida ne’e, sei lidera husi: Investigador Prinsipal Nasional, Dr. Rui da Cruz, hamutuk ho ekipa investigador sira. Implementasaun peskiza nemos, hala’o liu husi kolaborasaun entre; INCT no Badan Riset dan Inovasi Nasional (BRIN), Indonézia, nu’udar parte husi esforsu hamutuk, atu dezenvolve peskiza sientífika, ne’ebé relevante ba seguransa ai-han no dezenvolvimentu ekonomiku iha área fronteira.
Tuir kalendáriu no planu implementasaun ne’ebé iha, atividade peskiza ne’e, sei hala’o iha nasaun rua, Timor-Leste no Indonézia. Iha Indonézia, rekolla dadus no atividade peskiza refere, sei hala’o iha área Atambua, enkuantu iha Timor-Leste, sei hala’o iha Batugade, Munisípiu Bobonaro.
Enkontru ida ne’e, prezidi husi: Prezidente Konsellu Ezekutivu INCT, Dr. José Cornélio Guterres, no partisipa mos husi, Vise-Prezidente I Konsellu Ezekutivu INCT, Dr. Valentim Ximenes no Vise-Prezidente II Konsellu Ezekutivu INCT, Dr. Augusto da Conceição Soares, Investigador Prinsipal Nasional, Dr. Rui da Cruza no Dr. Agostinho da Cunha Moniz.