INCT NO ANAAA REALIZA SEMINÁRIU PRELIMINAR BA REZULTADU PESKIZA  TAXA EMPREGABILIDADE GRADUADU ÁREA DIREITU IHA TIMOR-LESTE

Díli, 13 Novembru 2026 – Institutu Nasionál Siénsia no Teknolojia (INCT, sigla iha Portugés), hamutuk ho Ajénsia Nasionál ba Avaliasaun no Akreditasaun Akadémika (ANAAA, sigla iha Portugés), realiza semináriu preliminár, ba aprezentasaun rezultadu projetu peskiza ho títulu: “Taxa Empregabilidade dos Graduados em Direito em Timor-Leste: Um Estudo Comparativo entre a UNTL, UNDIL, UNITAL e UNPAZ”, ne’ebé hala’o iha salaun INCT, Balide, Díli, Timor-Leste.

Iha intervensaun Prezidente Konsellu Ezekutivu INCT, Dr, José Cornélio Guterres, hateten: hodi INCT nia naran, hakarak hato’o agradese ba; Diretor Ezekutivu ANAAA, Dr. Nilton Paiva, ho nia ekipa teknika, ne’ebé servisu hamutuk ho INCT, realiza peskiza ida-ne’e, no agradese mos ba ekipa peskizador sira, ne’ebé responsabilidade ba projetu peskiza ida-ne’e, agradese mos ba partisipante sira, husi univesidade ha’at, durante hala’o kolaborasaun ho peskizador sira, hodi fo informasaun no dadus sira, kona-bá estudante graduadu sira, iha kursu area direitu.

“Peskiza ida-ne’e mak rezultadu husi kolaborasaun entre; INCT, ANAAA no Universidade sira. Liu-husi kolaborasaun ida-ne’e, hatudu katak; hadia kualidade edukasaun superior iha Timor-Leste, la’os responsabilidade instituisaun ida de’it, maibé responsabilidade hamutuk, nune’e, ita-nia interese la’os atu hatene de’it graduadu sira hetan servisu ka seidauk, maibé atu komprende mós, se formasaun ne’ebé sira hetan iha Universidade, prepara duni sira, atu responde ba nesesidade no ezijénsia merkadu traballu”.

Diretur Ezekutivu ANAAA, Dr. Nilton Paiva Mau, iha nia intervensaun hateten; Agradese tebes ba INCT, ne’ebé maka aseita ami nia pedidu, hodi kolabora ba projetu peskiza tinan ida-nee, projetu peskiza ne’e, la’os foin mak hahú, maibé hahú ona iha 2023, ho kursu Gestaun, 2024 ita iha Saude, 2025 ita iha Enjiñaria no tinan ida ne’e kona-bá Direitu. Entaun, liu-husi peskiza ida-ne’e, atu buka hatene informasaun no dadus estudante graduadu sira iha Universidade, bainhira sira remata sira nia estudu, iha kampu traballu ba sira ka lae?, no sira servisu tuir area ne’ebé  sira hili iha Universidade ka lae?. tanba ita iha esperensia tinan kotuk, peskizador sira ba halo peskiza, hodi husu kona-bá dadus, dalaruma dadus laiha, tanba ne’e, liu-husi peskiza ida-ne’e, ita atu asegura kualidade  ensinu superior iha Timor-Leste.

Semináriu preliminár ba aprezentasaun rezultadu peskiza ne’e mós, partisipa husi: Vise-Prezidente I Konsellu Ezekutivu INCT, Dr. Valentim Ximenes, Investigador prinsipal Dr. Marito Maia, Dr. José Tomás Alves no ekipa investigador sira, Dekanu no reprezentante dekanu Falkudade Direitu UNTL, UNPAZ, UNDIL no UNITAL,  dosentes, no funsionariu téknika sira husi ANAAA no INCT.