Díli, 21-23 Outubru 2026 – Institutu Nasionál Siénsia no Teknolojia (INCT, sigla iha Portugés), realiza semináriu preliminar ba aprezentasaun rezultadu husi projetu peskiza sientífiku hamutuk sanulu resin-lima (15), iha salaun INCT, Balide, Díli, Timor-Leste.
Semináriu preliminár ne’e nia objetivu maka: atu aprezenta no diskute rezultadu inisiál husi projetu peskiza sientífiku, hamutuk sanulu resin-lima (15), tinan fiskal 2026 nian, hodi hetan komentariu krítiku (feedback), sujestaun konstrutiva no validasaun husi avaliadór sira. Aleinde ne’e, semináriu preliminár ne’e, sai mós nu’udar plataforma ida, atu hametin diálogu no interasaun entre: investigador sira, instituisaun relevante no parte interesada sira; hodi identifika asuntu importante sira, ne’ebé presiza hetan esplorasaun kle’an liután, no formula rekomendasaun sira, atu orienta dezenvolvimentu peskiza sientífika iha futuru.
Iha intervensaun, Vise-Prezidente I, Konsellu Ezekutivu INCT, Dr. Valentim Ximenes, hateten; hanesan reprezenta, Prezidente Konsellu Ezekutivu INCT, hamutuk ho Sekretária Ezekutiva no diretores sira iha ne’e, sei akompaña atividade aprezentasaun semináriu preliminar ba loron ohin.
Vise-Prezidente I, Konsellu Ezekutivu INCT , Dr. Valentim Ximenes, Esplika katak; “INCT iha responsabilidade, atu jere no apoia atividade peskiza sientífika, iha área: siénsia, teknolojia no inovasaun. Prosesu peskiza sira, hala’o liu husi konkursu públiku, avaliasaun proposta, asinatura kontratu no implementasaun peskiza iha terenu”.
Vise-Prezidente I, Konsellu Ezekutivu INCT, Dr. Valentim Ximenes, subliña tan katak; Iha tinan 2026, projetu peskiza sientífika hamutuk sanulu resin-lima (15), ne’ebé agora tama ona iha faze aprezentasaun rezultadu, husi investigador ida-idak. Iha atividade ne’e, INCT hanesan jestor peskiza, hakarak rona no hare’e, rezultadu husi peskiza sira, ne’ebé sei hetan avaliasaun husi avaliadór sira. Rezultadu husi aprezentasaun no avaliasaun sira ne’e mós, sei kontinua aprezenta iha atividade, komemorasaun Loron Mundial ba Siénsia.
Semináriu preliminár ne’e, hala’o durante loron tolu (3); loron dahuluk, iha aprezentasaun ba projetu peskiza sientífika hamutuk ne’en (6), loron daruak, iha aprezentasaun hamutuk hitu (7) no loron datoluk, iha aprezentasaun hamutuk rua (2).
Enkuantu aprezentasaun ba projetu peskiza sientífiku sanulu resin lima (15) ne’e, modera husi Diretor Nasionál INCT sira no hetan avaliasaun husi avaliadór nasionál nomós avaliadór internasional sira. Peskiza sientífiku sanulu resin lima (15) ne’e mós, kompostu husi Siénsia Sosiais no Humanas, iha peskiza hamutuk hitu (7), Siénsia Exatas no Naturais, iha peskiza hamutuk lima (5), nomós Siénsia Teknolojia no Inovasaun, iha peskiza hamutuk tolu (3).
Atividade semináriu prelimináriu ne’e, hetan partisipasaun husi: Instituisaun liñas ministeriais, Institutu Públiku, Instituisaun Ensinu Superior, Organizasaun Naun-Governamental, investigador nasionál, avaliadór nasionál no internasional nst.