Díli, 21 Outubru 2026 – Institutu Nasionál Siénsia no Teknolojia (INCT, sigla iha portugés), liu husi; Prezidente Konsellu Ezekutivu INCT, Dr. José Cornélio Guterres, akompaña husi; Vise-Prezidente II INCT, Dr. Augusto da Conceição Soares, partisipa audiénsia públika ho komisaun G Parlamentu Nasional, ne’ebé trata asuntu Edukasaun, Juventude, Kultura no Sidadania, iha Parlamentu Nasionál, Díli, Timor-Leste.
Audiénsia públika ne’e, nia objetivu atu; koalia kona-bá Proposta Lei N.º 33/VI/(4.ª), kona-bá Orsamentu Jerál Estadu (OJE) ba tinan fiskál 2027.
Iha audiénsia públika ne’e, Prezidente Konsellu Ezekutivu INCT, Dr. José Cornélio Guterres, aprezenta pontu prinsipal sira, hanesan: relatóriu ezekusaun atividade no orsamentu 2026, no proposta orsamentu 2027 ba komisaun G iha Parlamentu Nasional.
“INCT kontinua implementa programa no atividade institusionál durante 2026, ho progresu iha área jestaun, dezenvolvimentu rekursu umanu, kooperasaun no peskiza sientífika. Iha área peskiza, estudu hamutuk sanulu resin sia (19), ne’ebé maka sei iha faze implementasaun, ho objetivu; atu produz koñesimentu no rekomendasaun sientífika, ne’ebé relevante ba prioridade dezenvolvimentu nasional. Nune’e ezekusaun finanseira to’o fulan Setembru atinje ona 64.40%, ho previzaun atu atinje 93.60%, to’o final tinan ne’e”.
Prezidente Konsellu Ezekutivu INCT, Dr. José Cornélio Guterres, akresenta liutan katak; INCT reafirma nia kompromisiu atu jere rekursu públiku ho responsabilidade, transparénsia no efisiénsia, hodi produz rezultadu sientífiku, ne’ebé bele kontribui ba formulasaun polítika públika no hadia bem-estar populasaun Timor-Leste.
Audiénsia públika ne’e, prezide husi: Prezidente Komisaun G Parlamentu Nasionál, Sr. Armando dos Santos Lopes, no marka prezensa husi: membru Komisaun G Parlamentu Nasionál, Vise-Primeiru Ministru no Ministru Interinu Ensinu Superiór, Siénsia no Kultura, Eng. Mariano ASSANAMI Sabino, Diretór Ezekutivu ANAAA, Dr. Nilton D. Paiva Mau, Magnífiku Reitór Universidade Nasionál Timor Lorosa’e (UNTL), Dr. Joviano A. da Costa, hamutuk ho estrutura Universidade nian, Prezidente IPB, Sr. Alcino da Costa I. A. Fernandes, nomos asesór nasionál no internasionál, diretór sira no xefe gabinete.