Díli, 18 Agostu 2026 – Institutu Nasional Siénsia no Teknolojia (INCT, sigla iha portugés), liu husi Diresaun Nasional Siénsia Sosiais no Humanas, Diretór, Dr. Leonel da Costa Xavier, kontinua hala’o monitorizasaun ba projetu peskiza sientífika tinan fiskal 2026, ne’ebé lidera husi Investigadór Prinsipál, Dr. Hélio Augusto da C. X. Mauquei, ho titulu Peskiza: “Strengthening Small and Medium Enterprises (SMEs) and Light Manufacturing in Timor-Leste: Pathways for Inclusive Economic Growth and Employment Generation”, iha Jacinto Plaza, Díli, Timor-Leste.
Objetivu prinsipál husi monitorizasaun ne’e maka, atu observa diretamente progresu implementasaun projetu peskiza, liu husi prosesu rekolla dadus no entrevista, ne’ebé Investigadór Prinsipál ho ekipa, hala’o ho Manejer “Mahanaim Garment & Manufacturing”, Sr. Karen Guterres Uitomo, iha loja Jacinto Plaza, Culuhun, Dili, Timor-Leste.
Hafoin entrevista no rekolla dadus iha Jacinto Plaza, ekipa monitorizasaun no investigador sira kontinua halo observasaun direta ba fatin “Mahanaim Garment & Manufacturing”, nu’udar fábrika iha área manufatura roupa nian, ne’ebé lokaliza iha Bidau.
Monitorizasaun ida ne’e mós, nia objetivu atu, garante kualidade atividade peskiza no asegura implementasaun projetu la’o tuir metodolojia, objetivu no padraun sientífiku sira, ne’ebé hakerek ona iha proposta peskiza ne’ebé submete ona ba iha INCT. Nune’e, monitorizasaun ne’e importante atu asegura kredibilidade no integridade ba rezultadu peskiza nian.
Atividade ba monitorizasaun peskiza ne’e, hetan partisipasaun husi: Diretór Nasional Siénsia Sosiais no Humanas, Dr. Leonel da Costa Xavier, Manager Mahanaim Garment & Manufacturing, Sr. Karen Guterres Uitomo, Investigadór Prinsipál, Dr. Hélio Augusto da C. X. Mauquei ho membru investigador sira.