Díli, 13 Agostu 2026 – Institutu Nasional Siénsia no Teknolojia (INCT, sigla iha portugés), hamutuk ho Ajénsia Nasional ba Avaliasaun no Akreditasaun Akadémika, Institutu Públiku (ANAAA, I.P.), hala’o reuniaun ho Investigador Prinsipal ba projetu peskiza sientífika konjunta, hodi halo aprezentasaun no diskusaun kona-bá proposta peskiza tinan fiskal 2026, iha salaun INCT, Balide, Díli, Timor-Leste.
Proposta peskiza ne’e ho títulu “Empregabilidade dos Graduados em Direito em Timor-Leste Um estudo comparativo entre a UNTL, UNDIL, UNITAL e UNPAZ”, nia objetivu prinsipal maka; atu analiza no komprende taxa empregabilidade graduadu sira husi Programa Estudu Direitu, liu husi komparasaun entre instituisaun ensinu superiór ha’at iha Timor-Leste.
Prezidente Konsellu Ezekutivu INCT, Dr. José Cornélio Guterres, iha intervensaun hateten, “peskiza ida ne’e importante tebes, tanba bele ajuda Governu no instituisaun relevante sira, iha prosesu elaborasaun politika no tomada desizaun kona-bá; empregabilidade graduadu sira iha Timor-Leste. Rezultadu peskiza bele sai baze ba ANAAA, I.P. hodi hala’o kontrolu kualidade, avaliasaun no akreditasaun ba instituisaun ensinu superiór no programa estudu sira iha Timor-Leste”.
Prezidente Konsellu Ezekutivu INCT, Dr. José Cornélio Guterres, salienta, peskiza ne’e importante mós ba INCT no universidade sira, tanba bele ajuda sira hare’e no avalia fali aspetu importante sira, hanesan; kuríkulu, rekursu umanu, no jestaun institusional. Liu husi rezultadu peskiza, bele identifika situasaun graduadu sira, ne’ebé hetan servisu maibé la tuir área estudu ne’ebé sira aprende iha universidade.
Peskiza refere sei foka ba instituisaun ensinu superiór ha’at (4), mak hanesan: Universidade Nasionál Timor Lorosa’e (UNTL), Universidade da Paz (UNPAZ), Universidade de Dili (UNDIL) no Universidade Oriental Timor Lorosa’e (UNITAL), ne’ebé sai prioridade ba implementasaun peskiza iha tinan fiskal 2026.
Enkuantu peskiza ne’e, sei lidera husi Investigador Prinsipal, Dr. Marito Maia no Dr. José Tomás Tavares, hamutuk ho ekipa investigador sira husi UNTL, UNPAZ, UNDIL no UNITAL.
Reuniaun ne’e prezidi husi Prezidente Konsellu Ezekutivu INCT, Dr. José Cornélio Guterres, no partisipa mós husi, Vise-Prezidente II Konsellu Ezekutivu INCT, Dr. Augusto da Conceição Soares; Diretur Ezekutivu ANAAA, I.P., Dr. Nilton D. Paiva Mau; Investigador Prinsipal, Dr. Marito Maia no Dr. José Tomás Tavares, hamutuk ho ekipa investigador sira.