Díli, 15 Maio 2024 – Komisaun G Parlamentu Nasionál, ne’ebé trata asuntu Edukasaun, Juventude, Kultura no Sidadania, Kuarta-Feira ne’e halo audiénsia públika ho Konsellu Ezekutivu Institutu Nasional Siénsia no Teknolojia (INCT, sigla iha Português).
Sorumutu ne’e hala’o iha sala enkontru komisaun nian, ne’ebé ho objetivu kontinuasaun ba apresiasaun dahuluk elaborasaun relatóriu no pareser ba Projetu Lei N.o 5/VI/(I.a) – Lei Baze ba Ensino Superior.
Iha biban ne’e, Prezidente Konsellu Ezekutivu INCT Dr. José Cornélio Guterres hato’o agradese ba Komisaun G tanba bele fó oportunidade ba INCT hodi ekspresa no partisipa iha esbosu lei baze Ensinu Superior nian. INCT mos hato’o ona karta proposta ida ba Komisaun G Parlamentu Nasionál, liu-liu kona-ba papel INCT nian ne’ebé seidauk temi klean iha Esbosu Lei Baze Ensino Superior no iha futuru mai sei iha lei ida ne’ebé sei koalia mos kona-ba Lei STI (Science, Technology and Inovation) sei refere liu kona-ba implementasaun polítika siénsia teknolojia no inovasaun iha Timor-Leste.
Prezidente Konsellu Ezekutivu INCT mos akresenta liu tan katak Peskiza sai hanesan pilar importante, tan ne’e INCT nu’udar institutu ida ne’ebé promove Siénsia Teknolojia no Inovasaun. Papel INCT nu’udar Institutu Públiku ne’ebé hahú atu kria kultura polítika bazeia ba evidénsia, polítika no planu halo laos bazeia ba rumoris no promesas, maibé tenki bazeia ba evidénsia, tan ne’e mak presija institutu ida atu bele garante ida ne’e.
I Vise-Prezidente Konsellu Ezekutivu INCT Dr. Valentim Ximenes mos haforsa tan katak bele konsidera mos Lei STI (Science Technology Inovation) ba implementasaun polítika siénsia teknolojia no inovasaun iha INCT.
Sesaun audiénsia públika ne’e, marka presenza hosi Prezidente Konsellu Ezekutivu INCT Dr. José Cornélio Guterres, I Vise-Prezidente Konsellu Ezekutivu INCT Dr. Valentim Ximenes no II Vise-Prezidente Konsellu Ezekutivu INCT Dr. Augusto da Conceição Soares.