Dili, 22 Fevereiru 2022 – Institutu Nasionál Siênsia no Teknolojia (INCT, sigla iha Português) realiza workshop kona-ba Science, Technology and Innovation (STI) Policy. Enkontru ne’e realiza hosi zoom meeting, ne’ebé prezide hosi Dr. Dionísio Soares Babo, iha sala enkontru INCT, iha Balide.
Objetivu hosi reuniaun ne’e atu diskute kona-ba sistema polítika nasionál STI, kriasaun polítika siênsia, sistema mapamentu hosi polítika STI iha Timor-Leste, ninia implementasaun no dezafiu sira futuru.
Prezidente Konsellu Ezekutivu INCT, Dr. José Cornélio Guterres iha ninia intervensaun hatete, Institutu dezenvolve kooperasaun ho Uniaun Europeia (UE) no OACPS hodi hala’o estudu viabilidade kona-ba projetu rua: kriasaun repozitório Dijitál Nasionál no programa STI hodi promove peskiza no dezenvolve (R&D) iha Timor-Leste.
Iha inisiu projetu sira ne’e, policy Service Facilities (PSF) rekruta espesialista painél, ne’ebé konstitui ho membru nain haat (4): Dr. Dionisio Babo Soares, nu’udar Prezidente painél, Dra. Paula Morais, hosi Portugal, Dr. Ron Dekker, hosi Holanda, no Sr. Amitav, hosi Canada. Desde fulan Novembru tinan 2021, painél sira halo ona intervista ho parte interesada sira iha programa rua (2) ne’ebé mensiona.
Iha workshop ne’e Dra. Paula Morais, Dr. Amitav no Ron Dekker halo aprezentasaun mos kona-ba Introductions Prototype, Systems mapping a STI policy for Timor Leste no Brainstorming a STI policy for Timor Leste.
Projetu ne’e hetan apoiu hosi Uniaun European no implementa hosi Organizasaun Afrikanu, Antillas no Estadu Pasífiku (OACPS).
Partisipa iha enkontru ne’e I Vise-Prezidente Konsellu Ezekutivu INCT, Dr. Valentim Ximenes, OACPS R&I PSF, Sr. Alessandro Bello, Reitor Universidade Nasionál Timor Lorosa’e (UNTL), Dr. João Soares Martins, Prezidente JSU, João Saldanha, Reitor ICR, Pe. Crisostomo Salar, Reitor UNITAL, Dr. Florindo Pereira no Dr. João Maria dos Reis C. Noronha.