Díli, 24 Setembru 2024-Instituto Nacional de Ciências e Tecnologia (INCT) selebra ezisténsia INCT-TL ba dala-sanulu ho atividade ‘Talk Show’ no inagura edifisiu foun INCT nian.
Iha diskursu Prezidente Konsellu Ezekutivu INCT, Dr. José Cornélio Guterres hateten iha tinan sanulu liu-bá iha konselhu Ministru V Governu Konstituisionál Timor-Leste, hanoin katak nasaun atu dezenvolvidu no avansadu tenke liu husi peskiza. Husi Estudu no dadus peskiza bele fó solusaun ba desizaun polítika, tan ne’e mak deside hari’i INCT-TL. INCT hamri’ik iha loron 3 fulan Setembru tinan 2014 ho dezafiu barak no hahú lao iha 2019 ho misaun atu promove no avansu ida ba konhesimentu sientífiku no teknologijiku iha Timor-Leste liu hosi kriasaun ba konhesimentu no estimula nia difuzaun no aplikasaun prátika nudar fatór xavi ba dezenvolvimentu hodi melhoria bem-estar populasaun. INCT mos hatu’ur ona ninia Orgaun, Planu Estratégiku 2022-2030, konsege servisu hamutuk ho peskizador sira hala’o peskiza hamutuk neen-nulu resin, Prodúz Manuál Étika no Manuál Peskiza hodi guia peskiza sira no sei hari’i Repozitóriu Nasionál hodi konserva peskiza sientífiku, hala’o estudu hamutuk ho Uniaun Europeia kona-ba Lei STI (Science Technology and Innovation) ne’ebé sei termina iha 2025, hala’o ‘Mapa da Ciência’, Revista Sientífiku no agora dadaun servisu hamutuk ho Ministériu Negósiu Estrangeiru no Kooperasaun prosesu númeru ISSN (International Standard Serial Number) husi Paris ne’ebé sei oferese ba INCT hodi distribui ba peskiza siéntifiku no artigu.
Marka mos prezensa husi Sua Exelénsia Sr. Vise-Primeiro-Ministro Koordenador Asuntu Sosiais no Ministro Dezenvolvimentu Rural no Abilitasaun Komunitária Eng. Mariano Assanami Sabino mos senti kontenti hodi partisipa no selebra aniversário INCT ba dala-sanulu. Sua Exelénsia mos hatutan tan katak INCT hanesan Instituto ida ne’ebé importante tebes ba nasaun Timor-Leste, promove teknolojia laiha tan opsaun hakarak ka lakohi, tanba la kleur tan Timor-Leste tama ba ASEAN, ita mantén CPLP no organizasaun oi-oin ne’ebé ita hola parte ita tenke moderniza por etapa. Sua Exelénsia mos husu atu koopera ho universidade públiku no privada sira hodi hasa’e númeru peskiza ne’ebé ho kualidade. No oinsa utilizasaun teknologia no inovasaun iha setór hotu-hotu, ezemplu hanesan setór-agricola, komérsiu no seluk tan.
Atividade ‘Talk Show’ ne’e, marka prezensa husi oradores Sua Exselénsia Ministro Ensino Superior Siénsia no Kultura Dr. José Honorio da C. P. Jerónimo, Presidente Konsellu Ezekutivu INCT Dr. José Cornélio Guterres, Magnifico Reitor Universidade Timor Lorosa’e (UNTL) Prof. Dr. João Soares Martins no Investigadora Nasionál Dra. Brigida Antonia Correia ho tema ‘Um olhar sobre os primeiros 10 anos da Existência do Instituto Nacional de Ciências e Tecnologia de Timor-Leste equanto Agência Promotora do Conhecimento Científico e Tecnológico para o bem estar do povo Timorense’ no distribuisaun sertifikadu ba funsionáriu INCT nu’udar símbolu agradesimentu ba servisu durante tinan sanulu no sai hanesan memória instituisaun.