Díli, 22 Agostu 2022 – Estrutura Institutu Nasionál Siênsia no Teknolojia (INCT, sigla iha Português) hala’o sorumutu ho Xefe Gabinete Primeiru-Ministru (XGPM), Dr. Azevedo Lourenço da Costa Marçal ho ekipa iha sala enkontru Gabinete Primeiru Ministru, Palásiu Governu.
Iha intervensaun, Xefe Gabiente ne’e hatete, objetivu prinsipál enkontru ne’e atu diskute Projetu Investigasaun Siêntifika kona-ba Kadeia Valór atu nune’e hodi investe iha área estratéjiku dezenvolvimentu país nian no halo mos identifikasaun ba área prioritáriu sira ne’ebé bele sustenta ekonómia país hodi hamenus esportasaun.
Iha biban ne’ebé hanesan, Prezidente Konsellu Ezekutivu INCT, Dr. José Cornélio Guterres, agradese ba inisiativa hosi Xefe Gabinete Primeiru-Ministru no ekipa hodi diskute área prioridade sira ba peskiza sientífika ligadu ho Kadeia Valór. Nia mos hatutan, Governu hari INCT ho intensaun atu fó apoiu estadu liu-hosi peskiza sientífika sira. Nia mos apela katak, ita halo dezenvolvimentu tenke la’o ho estudu. No nia konsidera peskiza ne’e importante ba dezenvolvimentu país.
Segundu I Vise-Prezidente Konsellu Ezekutivu INCT, Dr. Valentim Ximenes, informa, INCT nia papel mak atu tau matan ba investigasaun sientífika, tantu aplikada no bázika. Ho nune’e, aprezenta tématika ba investigasaun rua (2) hanesan “Dezenvovlvimentu Setor Agrikultura no Sustentabilidade Ekosistema Hodi Fomenta Valor Kadeia Alimentar” no “Dezenvolvimentu Ekónomiku Sustentavel, Diversifikadu no Inkluzivu” ne’ebé kompostu hosi liña peskiza sanulu (10) no projetu estudu lima (5) hodi sustenta polítika kadeia alimentar.
II Vise-Prezidente Konsellu Ezekutivu INCT, Dr. Augusto da Conceição L. Soares, iha nia intervensaun felisita Oitavu Governu Konstituisionásl ne’ebé esforsa hodi aselera dezenvolvimentu setor ekonomia. Iha nia observasaun hatete, Governu tenke koopera didiak ho INCT nu’udar parseiru ba projetu peskiza sira atu nune’e Institutu bele fornese dadus, polítika, rekomendasaun sira relativamente ho polítika Kadeia Valór no polítika ba kada liña Ministeriál sira.
Atu termina, Prezidente Ezekutivu informa, sei elabora proposta peskiza no identifika área prioridade sira hodi mai aprezenta iha enkontru tuir mai.