Díli, 05 Novembru 2026 – Institutu Nasionál Siénsia no Teknolojia (INCT, sigla iha Portugés), realiza atividade avaliasaun final kona-bá; Olimpíada Siénsia no Teknolojia INCT nian, ne’ebé halo aprezentasaun husi, estudante konkorente sira, iha salaun INCT, Balide, Díli, Timor-Leste.
Avaliasaun faze daruak ne’e nia objetivu, atu fó oportunidade ba estudante konkorente ida-idak, hodi aprezenta projetu ne’ebé sira dezenvolve, tuir tema no ideia rasik kona-bá Intelijénsia Artifisiál (AI). Liu husi aprezentasaun ne’e, painél avaliadór independente sira, bele avalia estudante sira-nia koñesimentu, kapasidade, kreatividade, inovasaun no abilidade atu esplika no defende projetu ne’ebé sira kria.
Iha sesaun abertura, Prezidente Konsellu Ezekutivu INCT, Dr. José Cornélio Guterres, hato’o agradese ba membru painél avaliador sira, ne’ebé simu konvite atu partisipa no fo sira-nia kontribuisaun independente, iha prosesu avalizasaun ida-ne’e. Prezidente Konsellu Ezekutivu INCT, Dr. José Cornélio Guterres, mós hato’o parabéns no kongratulasaun ba estudante sira, ne’ebé konsege pasa ba etapa tuir mai, atu aprezenta sira-nia rezultadu, koñesimentu no ideia kona-ba Intelijénsia Artifisiál (AI).
“etapa ida ne’e, imi sei hetan avaliasaun husi avaliador independente sira, ne’ebé sei avalia imi nia koñesimentu, kapasidade, kreatividade, inovasaun no abilidade atu esplika no defende imi nia ideia sira. Olimpiada AI ida ne’e, la’os de’it kompetisaun atu buka manan na’in, maibé oportunidade importante, atu dezelvolve koñesimentu, kapasidade sientífika no interese ba teknolojia foun”.
Prezidente Konsellu Ezekutivu INCT, Dr. José Cornélio Guterres, subliña tan katak; ita hotu hein katak, atividade ida-ne’e, bele sai hanesan baze, atu prepara no dezenvolve jerasaun foun sientista, peskizadór, enjiñeru no inovadór sira, iha área Intelijénsia Artifisiál, iha futuru sientista foun Timor-Leste.
Olimpíada Siénsia no Teknolojia tinan ida-ne’e, iha tematika: “Uso de AI pelos Estudantes Universitários de Licenciatura para a Elevação dos Seus Conhecimentos Científicos nas Áreas de STEAM”. Iha faze final ne’e, iha painél avaliador independente hamutuk na’in ha’at, hodi halo avaliasaun ba iha estudante konkorente sira, ne’ebé hamutuk na’in hitu, ne’ebé halo aprezentasaun iha avaliasaun faze final nian.
Atividade ida-ne’e, hetan mós partisipasaun husi: Vise-Prezidente I INCT, Dr. Valentim Ximenes, Vise-Prezidente II INCT, Dr. Augusto da Conceição Soares, Sekretaria Ezekutiva INCT, Dra. Maria Elsa D. Correia, Diretores Nasionál INCT, membru painél avaliadór, estudante konkorente sira, no funsionariu INCT.