Díli, 03 Setembru 2026– Institutu Nasional Siénsia no Teknolojia (INCT, sigla iha portugés), selebra aniversáriu ba dala XII ho realizasaun atividade reflesaun institusional, iha salaun INCT, Balide, Díli, Timor-Leste.
Objetivu husi atividade ne’e maka, halo Reflesaun no Avaliasaun Interna, Hare’e no Diskute Implementasaun Planu Estratéjiku INCT, Diskute no Harmoniza Proposta Prioridade sira, Hametin Kordenasaun Komunikasaun no Identifikaa Rekomendasaun Konkretu ne’ebé presija kontinua hadia ba oin.
Iha intervensaun, Prezidente Konsellu Ezekutivu INCT, Dr. José Cornélio Guterres, hateten; “ohin, ita hamutuk selebra aniversáriu ba dala sanulu resin-rua (12), Institutu Nasional Siénsia no Teknolojia (INCT). Iha momentu importante ida-ne’e, parabéns no apresiasaun bo’ot ba ita hotu, ne’ebé durante ne’e fó ona kontribuisaun, dedikasaun no kompromisu ba dezenvolvimentu no haforsa INCT”.
“Aniversáriu ida-ne’e, la’ós de’it selebrasaun ba tinan 12, maibé mós, sai hanesan oportunidade ida, atu hare’e fila-fali servisu no progresu sira hotu, ne’ebé ita hotu hala’o hamutuk. Liu husi kolaborasaun, responsabilidade no espíritu servisu hamutuk, ita kontinua hari’i no dezenvolve sistema institusional, ida ne’ebé diak, forte no sustentável. Sistema hotu-hotu iha INCT ita buka atu halo funsiona ho di’ak, hahu husi diresaun, liu husi estrutura Ezekutivu, Sekretariadu, Diretores, Xefe Divizaun no funsionáriu sira hotu. Kada estrutura no kada ema, iha ninia responsabilidade rasik, maibé objetivu ida de’it, maka; atu garante INCT bele hala’o nia kna’ar ho efisiente, transparente no profisional. Iha tinan 12 ne’e, ita aprende barak, hasoru desafiu oioin no hetan mós oportunidade atu hadi’a. Tanba ne’e, ita presiza kontinua hametin, haforsa no konsolida INCT, ne’ebé sei sai prioridade ba instituisaun”.
Prezidente Konsellu Ezekutivu INCT, Dr. José Cornélio Guterres, mos apela, ita tenke kontinua servisu ho espíritu ekipa, respeitu malu, responsabilidade no kompromisu. Tanba, susesu ba instituisaun ida, la mai husi esforsu ema ida nian, maibé mai husi servisu hamutuk no unidade ekipa tomak.
Enkuantu iha atividade ne’e, hala’o mó aprezentasaun husi;
- Xefe Divizaun Planeamentu no Finansas, Sr. Calistro Maria Correia, aprezenta kona-bá “Relatóriu Ezekusaun Atividade 2026, Pontu Situasaun Planu Estratéjiku INCT 2022–2030, Planu 2027, Diskusaun no Harmonizasaun.”
- Diretor Nasional Siénsia Naturais no Exatas, Sr. Valente Ferreira, aprezenta kona-bá “Relatóriu Peskiza 2026 no Preparasaun ba Olimpiade Siénsia.”
- Diretor Nasional Katalogasaun Siénsia no Repozitóriu Siéntífiku Nasional, Sr. Benvindo D. J. Guterres, aprezenta kona-bá “Programa Loron Mundial Siénsia no Lansamentu ISSN iha Timor-Leste.”
- Xefe Divizaun Teknolojia Informasaun no Komunikasaun, no Media, Sr. Luciano da Costa Alves, aprezenta kona-bá “Prosesu Preparasaun Video ba iha: Perfil INCT, Lansamentu ISSN, Peskiza 15 INCT 2026 no Peskiza Dezenvolvimentu 3.”
Atividade ne’e, hetan partisipasaun maximu husi Prezidente Konsellu Ezekutivu INCT, Dr. José Cornélio Guterres, Vise-Prezidente II, Dr. Augusto da Conceição Soares, Sekretária Ezekutiva, Dra. Maria Elsa Diogo Correia, Assesor Internasional, Dr. Felipe Abrão M. do Couto, Diretor Nasional, Xefe Divizaun no funsionáriu sira hotu INCT nian.
