Atauro, 11-12 Juñu 2026 – Institutu Nasionál ba Siénsia no Teknolojia (INCT, sigla iha portugés), liu husi Sekretária Ezekutiva INCT, Dra. Maria Elsa Diogo Correia, no Diretora Nasionál ba Teknolojia no Inovasaun INCT, Sra. Jacinta dos Santos Guterres, hamutuk ho Investigador Prinsipal Nasional no Internasional, hala’o enkontru ho Autoridade Administrativa Munisípiu Atauro, Diretor Organizasaun Roman Luan no Diretora Beni Marine Unip., Lda.
Atividade ida-ne’e, hala’o nu’udar parte husi peskiza ho tema “International Study on ASEAN Maritime Tourism Route Development in Timor-Leste”, ho objetivu atu rekolla dadus no informasaun relevante, hodi identifika no mapea potensial turístiku sira, ne’ebé liga ho setor marítimu iha Timor-Leste. Peskiza ne’e inklui área mariña, atividade rekreativa, no eventu sira ne’ebé iha poténsia atu kontribui ba promosaun no dezenvolvimentu destinasaun turístika marítima iha Timor-Leste.
Durante atividade ne’e, ekipa peskiza hala’o enkontru ho Autoridade Administrativa Atauro, organizasaun Roman Luan no Beni Marine Unip., Lda, nomós realiza observasaun direta iha terenu, inklui atividade peskizador sira, ne’ebé tun ba tasi hodi observa kondisaun no diversidade koral iha tasi laran. Rekolla mos informasaun, husi operadór turizmu no parte relevante sira, atu suporta prosesu peskiza no identifika oportunidade sira, ba dezenvolvimentu turizmu marítimu.
Rezultadu husi peskiza ne’e, sei kontribui ba formulasaun politika no estratéjia ba dezenvolvimentu mapeamentu rota turistika turizmu marítimu iha Timor-Leste, liuliu hodi identifika no mapea potensial turístiku sira, ne’ebé liga ho setor marítimu, inklui área mariña, atividade rekreativa no eventu sira, ne’ebé bele promove no fortalece dezenvolvimentu destinasaun turístika marítima iha Timor-Leste.
Iha vijita enkontru ne’e, hetan partisipasaun másimu husi Sekretaria Ezekutiva INCT, Dra. Maria Elsa Diogo Correia, Diretora Nasionál Teknolojia no Inovasaun INCT, Sra. Jacinta dos Santos Guterres, Investigadór Prinsipál Nasional, Dr. Mário Marques Cabral, Dr. Feliciano Quintas do Céu ho ekipa, Investigadór Prinsipál Internasional Prof. Dr. Drs. I Nyoman Sunarta, Ir. Moh. Saifulloh, nomos representante Presidente Autoridade Administrativo Atauro, Sr. Vicente Sanches Soares, Diretor Organizasaun Roman Luan, Sr. Marcelo Belo Soares no Diretora Beni Marine Unip., Lda, Sra. Maria Jerónimo.