Díli, 20 Fevereiru de 2026 – Instituto Nacional de Ciência e Tecnologia (INCT) hala’o enkontru ho Centro Internacional ISSN nomós UNESCO-JAKARTA hodi diskute konaba planu estabelesementu Centro Nacional ISSN iha Timor-Leste.
Iha enkontru refere Prezidente INCT Dr. José Cornélio Guterres agradese tebes ba Centro Internacional ISSN nune’e mos UNESCO Jakarta ba disponibilidade hodi hala’o enkontru ho ekipa Instituto Nacional de Ciência e Tecnologia de Timor-Leste. Prezidente INCT mós informa katak prosesu kriasaun ba Centro Nacional ISSN iha Timor-Leste nu’udar mandatu husi INCT ne’ebe mak aliñea mós ho prioridade nasional. Prosesu ne’e rasik la’o kuaze liu tinan tolu ona, maibe kontente tamba ohin konsege iha resposta direta husi Centro Internasional ISSN, iha Paris, França. Ikus liu Prezidente INCT mós introduz konaba pontu situasaun atual hanesan: kriasaun ba repozitóriu nasional, revista siénsia e teknolojia, total Instituisaun Ensinu Superior iha Timor-Leste, Rejime Jurídiku depózitu legal nst.
Iha biban hanesan, Diretora Centro Internacional ISSN Dra. Gaëlle Bequet, PhD, mós apresia tebes ba INCT nia interrese hodi sai membru ba Centro Internacional ISSN nomós kongratula INCT ba progessu ne’ebe mak hala’o ona. Diretora Gaëlle mos informa katak, dadauk nee ISSN Internasional kompostu husi membru 96 husi nasaun oin-oin. Diretora ne’e mos reforsa katak, prosesu kriasaun ba Centro Nacional ISSN normalmente iha faze tolu: primeiru, pedidu ofisial husi governu ba ISSN Internasional liuhosi UNESCO-Paris, assinatura akordu entre Centro Internacional ISSN ho Instituisaun Responsável ba ISSN Nasional no ikus liu mak treinamentu ka Capacity Building.
Enkontru ne’e rasik modera husi Dra. Fareshted Rafieian husi UNESCO-JAKARTA ne’ebe mak durante ne’e apoiu makas mós INCT hodi aproxima ho Centro Internacional ISSN ne’ebe mak lokaliza iha Paris, França.
Enkuantu Partisipa iha enkontru refere mak I Vise Prezidente INCT ba Assuntu Peskiza no Externa, Dr. Valentim Ximenes, II Vise Prezidente INCT ba Assuntu Administrasaun no Finanas Dr. Augusto da Conceição, Sekretária Ezekutiva INCT, Dra. Maria Elsa Diogo Correia nomós Diretor Nasional Katalogasaun no Repozitóriu Sientífiku Nasional Sr. Benvindo D. J. Guterres.