INCT HALO DISKUSAUN TÉKNIKA HO MNEK KONA-BA PEDIDU ISSN
Díli, 17 Jullu 2024 – Prezidente Konsellu Ezekutivu Institutu Nasional Siênsia no Teknolojia (INCT, sigla iha Portugés), Dr. José Cornélio Guterres akompaña hosi II Vise-Prezidente Konsellu Ezekutivu, Dr. Augusto da Conceição Soares, halo enkontru ho Sekretáriu Jerál Ministériu Negósiu Estranjeiru no Kooperasaun (MNEK), Sr. João Freitas de Câmara, hodi diskute kona-ba pedidu lisensa ba númeru identifikasaun Internasionál Standar Serial Number (ISSN) iha Timor-Leste.
Prezidente konsellu Ezekutivu agradese Sekretáriu Jerál MNEK hodi partisipa iha diskusaun tekniku kona-ba ISSN, ne’ebé durante ne’e Ministériu Ensinu Superiór halo kooperasaun ho MNEK karta deklarasaun reprezenta Timor-Leste aplika ba prosesu akizasaun ISSN.
Prezidente informa, rekezitu atu hetan ISSN tenke iha depózitu legál, revista sientífiku no ikus mak pedidu ofisiál husi MNEK hodi dirije ba UNESCO Paris. ita hatene katak durante ne’e ita nia universidade sira barak liu hetan numeru ISSN ne’e hosi nasaun seluk agora dadauk INCT trata ne’e atu sai nain ba direito distribuisaun numeru ISSN ne’e rasik nune’e ita universidade sira hakerek jornal sientifiku sira nebe’e atu halo publikasaun tenke hetan numero ISSN hosi INCT, ne’ebé agora ita luta hela para ita mak sai nain ba distribuisaun ISSN iha Timor-Leste. Entretantu, oras ne’e daudaun INCT presiza pedidu refere atu kompleta rekezitu hodi aplika ba prosesu refere. Oras ne’e daudaun iha nasaun 93 mak hetan ona númeru ISSN.
Sekretáriu Jerál MNEk informa kriasaun ISSN ne’e importante tebes no konsidera INCT hanesan Instituisaun apropriadu hodi responsabiliza no apela sei fó apoiu másimu ba INCT hodi bele hetan direitu ba ISSN hodi responsabiliza ba atribuisaun kódigu ISSN ne’ebé mai hosi institusaun universitária, organizasaun, publikasaun, relatóriu sientifiku, inklui publikasaun hosi peskizadór sira.
Enkontru ne’e partisipa hosi Diretór Jerál Asuntu Multi-laterál MNEK, Sr. Leoneto Mantilo, Diretór Legál MNEK, Francisco Ornai, Diretór Nasionál Katalogasaun Siénsia no Repozitóriu Sientífiku Dijitál INCT, Benvindo Guterres, Diretór Nasionál Siénsia Ezatas no Naturais, Valente Ferreira no Xefe Divizaun sira.
