Díli, 1 Fevereiru 2024 – Koordenador Prinsipal Southeast Asia Neighbourhoods Network (SEANNET), Prezidente Konsellu Ezekutivu Institutu Nasional Siênsia no Teknolojia (INCT) hala’o audiênsia ho Xefe Suku Komoro, Sr. Eligio José da Silva Marçal iha sala enkontru sede suku Komoro. Objetivu hosi sorumutu ne’e atu introdus ba Lider Komunitariu atual kona-ba projetu investigasaun sientífika (SEANNET) nian.
Iha intervensaun, Prezidente Ezekutivu INCT agradese ba Xefe Suku no kongratula ba kargu foun no hahú introdus papel no misaun INCT no parseiru kooperasaun hosi projetu peskiza ne’e. Nia hatete, projetu peskiza ne’e atu hare kona-ba komunidade sira ne’ebé hela iha área risku (mota ninin) no motivu hosi sira emigra mai Díli, inklui komportamentu komunidade nian iha ambiente sira hela ba.
II Vise-Prezidente Asuntu Administrasaun no Finansas, Dr. Augusto da Conceição Soares reforsa liu-tan katak kooperasaun ne’e INCT hala’o ho Universidade Sinagapura hodi apoiu ita iha área peskiza hodi hare atitude komunidade nian ho ambiente, ho nune’e ita sei envolve lider komunitaria sira hotu atu partisipa hamutuk hodi fó apoiu peskiza ne’ebé nia benefisiu ba ita rasik.
Nune’e, Investigadora Dra. Hendriketa da Silva husu ba lider ne’e atu fó apoiu nia ekipa bainhira tun ba iha terenu hodi fasilita sira foti dadus hosi komunidade. Nia mos relata katak durante ne’e sira hala’o ona peskiza iha baze no komunidade balun mak koopera, maibé familia balun sei falta informasaun hodi la koopera ho di’ak.
Xefe Suku Komoro, Sr. Eligio José da Silva Marçal afirma katak hosi nia parte prontu atu koopera hamutuk ho INCT no Investigador sira, inklui enumerador atu hala’o peskiza ida ne’e ba oin. Mezmu foin asumi kna’ar iha fulan rua nia laran, maibé nia fiar katak komunidade sei rona no halo tuir saida mak ita hakarak hato’o ba sira.