Díli, 15 Janeiru 2024 – Institutu Nasional Siênsia no Teknolojia (INCT, sigla iha Português), segunda-feira ne’e realiza Serimonia Asinatura Termu Kontratu ba Funsionáriu Foun Ajente Administrasaun Públika (AAP), iha salaun INCT, Balide.
Iha intervensaun, II Vise-Prezidente Konsellu Ezekutivu INCT, Dr. Augusto da Conceição Soares ne’ebé hanesan mos Prezidente Júri iha prosesu rekrutamentu ba AAP nian, hato’o agradesimentu ba ekipa hosi Komisaun Funsaun Públika, nomeadamente Vogal ba Rekrutamentu, Sr. Manuel Doutel, Xefe Departamentu ba Rekrutamentu, Sr. Alfredo Bili no Diretora Nasional Rekrutamentu, Sra. Marcelina Irene dos Santos ne’ebé koopera di’ak tebes ho INCT iha prosesu ida ne’e. Nia mos relata katak total kandidatu ne’ebé mak submete dokumentu hamutuk atus haat, haat nulu resin tolu (443) ne’ebé mak aplika ba vaga ida ne’e no hafoin halo selesaun iha faze tolu (3), ikus mai kandidatu nain neen (6) mak admitidu hodi asina termu aseitasaun.
Prezidente Konsellu Ezekutivu INCT, Dr. José Cornélio Guterres, iha nia diskursu hatete, Institutu ida ne’e ho natureza diferente no instituisaun ida ne’ebé sientífiku ne’ebé ezizi servisu maka’as no produtividade. Nia mos husu ba funsionariu emposadus sira atu kumpri komprimisu kontratu, atu nune’e bele atinje objetivu instituisaun nian.
Nune’e mos Prezidente Interinu Komisaun Funsaun Públiku, Sr. Fausto Freitas da Silva hatete objetivu hosi sorumutu ne’e atu simu grupu talentu ne’ebé dedikadu atu serbi ba Instituisaun, Estadu no Povu ida ne’e. Nia mos hatutan, atu funsionariu sira ne’e bele defende valor integridade no imparsialidade.
Iha atividade ne’e mos, Reverendo Padre Manuel Pinto SDB fó mos bensaun ba edifisiu INCT no salaun foun ne’ebé foin remata nia kontrusaun.
Serimónia ne’e hetan partisipasaun hosi ekipa KFP, Vise-Prezidente INFORDEPE, Diretor Jeral Planeamentu no Finansas Ministériu Ensinu Superior, Siênsia no Kultura (MESSK), Sr. Hernani da Costa Soares, Reprezentante ANAAA, Reverendo Padre Manuel Pinto, SDB, Diretor Nasional INCT, Xefe Departamentu INCT no funsionariu sira hotu.