Díli, 16 Outubru 2023 – Segunda-Feira ne’e, Investigador hamutuk ho membru sira halo enkontru ho Estrutura Institutu Nasional Siênsia no Teknolojia (INCT, sigla iha Português), no ekipa Ajensia Nasional ba Akreditasaun no Avaliasaun Akademika (ANAAA), iha sala enkontru INCT.
Objetivu hosi reuniaun ne’e atu halo primeira aprezentasaun kona-ba peskiza ho tema “Taxa Empregabilidade ba Graduadu sira iha Timor-Leste” hodi rekolla dadus estudante sira ne’ebé gradua ona hodi hare ba servisu ne’ebé sira haknaar an ba nomós área servisu sira hosi peskizador Dr. Domingos Caereci Beremau.
Iha observasaun, estrutura INCT husu atu mellora iha estrtura peskiza, metodolojia, língua no seluk tan. Rezultadu peskiza ne’e sei aprezenta ba Universidade no painel project sira. Projetu investigasaun sientífika ne’e hetan kooperasaun hosi INCT no ANAAA no finansia diretamente hosi ANAAA tuir akordu ne’ebé asina ona.
Enkontru ne’e lidera hosi I Vise-Prezidente Konsellu Ezekutivu INCT, Dr. Valentim Ximenes no akompaña hosi II Vise-Prezidente Konsellu Ezekutivu INCT, Dr. Augusto da Conceição Soares no marka prezensa hosi membru investigador sira nomos reprezentante hosi ANAAA.