Díli, 27 Setembru 2023 – I Vise-Prezidente Konsellu Ezekutivu Institutu Nasional Siênsia no Teknolojia halo enseramentu ba atividade seminariu preliminariu investigasaun sientífika tinan fiskál 2023 nian hafoin aprezentasaun iha loron datoluk ne’e.
Iha intervensaun, Diretora Jeral Ensinu Superior no Siênsia, Dra. Maria Filomena Lay Guterres felisita Prezidente INCT ba eventu ne’ebé ho importansia boot ba nasaun no felisita mos ba investigador ne’ebé ho esforsu boot aprezenta ona rezultadu peskiza sientífika ida ne’e. Diretora Jeral ne’e resalta katak INCT mak sai knuuk no fatin ba mudansa dezenvolvimentu. Propoen mos atu estrutura INCT konsidera hodi tau iha planu kona-ba peskiza iha área sosiukultural, hodi nune’e bele prezerva nafatin ita nia identidade ka orijinalidade lolos nu’udar Timor Oan. Sujere mos atu aprezentasaun no elaborasaun ba rezultadu investigasaun sientífika sira ne’e tenke ho lian Portuguêsa, tanba oras ne’e daudaun Ministériu propoen hela atu lian Português sai hanesan lian prinsipal ba Ensinu.
Nune’e mos, antes ensera semináriu ne’e, I Vise-Prezidente Ezekutivu, Dr.Valentim Ximenes, informa pontu situasaun jeral ba seminariu refere no hatete atu peskziador/a sira kontinua foti dadus hodi kompleta rezultadu peskiza tuir kalendariu ne’ebé INCT haruka ona, tanba fixa ona data ba aprezentasaun final iha loron 30 Novembru. Solisita mos atu peskizador sira kumpre nafatin regra traballu no aprofunda nafatin peskiza sira ne’e.
Aprezentasaun iha loron ikus ne’e kompostu hosi Dra. Teresinha Albertina Soares no ekipa ho títulu “Estudo de Desenvolvimento Curricular no Ensino Básico: Desafios e Soluões” no avalia hosi Dra. Célia Maria da Silva Oliveira no Dra. Helen Hill, Dr. António da Costa Fernandes kona-ba “As Alterações Significativas da Circulação Rodoviária em Díli, Timor-leste – Identificação dos Problemas e Soluções Para o Tráfico e Rodoviário na Capital de Tmor-Leste” ho avaliador Dr. Câncio Monteiro no Dr. Junior Raimundo da Cruz no aprezentasaun ikus iha parte lokraik mak hosi Dra. Teresa Freitas Belo, ho títulu “The Impact of Inflation on Income and Consumption Behaviour After Covid-19 Pandemic in Timor-Leste (Case Study: Permanent Civil Servants)”.
Atividade ne’ebé dekore durante loron tolu (3) ne’e hetan partisipasaun hosi Estrutura INCT, Reprezentante Liña Ministerial, Peskizador/a sira, Estudante UNTL no funsionariu INCT rasik.