Dili, 13 Setembru 2023 – Prezidente Konsellu Ezekutivu Institutu Nasional Siênsia no Teknolojia (INCT, sigla iha Português), Dr. José Cornélio Guterres prezide reuniaun dahuluk Konsellu Sientífiku hodi nomea kandidatu na’in tolu (3) ba Prezidente Konsellu Sientífiku ba tinan haat (4).
Iha enkontru ne’e, Prezidente Ezekutivu INCT, Dr. José Cornélio Guterres agradese ba membRU foun sira ne’ebé bele mai partisipa iha reuniaun dahuluk no nia salienta liu tan katak objetivu hosi sorumutu ne’e atu halo eleisaun ba Prezidente Konsellu Sientífiku foun, nomeasaun membru foun rua (2) hodi sai nu’udar membru Konsellu Jeral no aprezentasaun progresu ezekusaun orsamentu jeral 2023 no Planu Asaun Anual 2024 nian.
Tuir lei ne’ebé prevista ona, kandidatu ba Prezidente Konsellu Sientífiku ne’e sei hetan nomeasaun hosi Prezidente Ezekutivu INCT, ho nune’e, Prezidente INCT nomea Dr. Cancio Monteiro, Dr. Carlito de Araújo Mali Code, Dr. Ana Isabel de Fatíma Sousa Soares. Iha prosesu eleisaun ne’e membru sira deside ho unaminidade hodi re-eleita Dr. Ana Isabel de Fatíma Sousa Soares sai nu’udar Prezidente Konsellu Sientífiku ba mandatu tinan haat (4), hahú hosi tinan 2023 to’o 2028.
Iha fatin ne’ebé hanesan, Prezidente eleita dirije kedas reuniaun dahuluk no nomea Dr. Carlito de Araújo Mali Kode no Dra. Laurentina Barreto Soares hodi sai nu’udar membru Konsellu Jeral nian. Iha sorumutu ne’e mos membru sira hamutuk ho Prezidente Konsellu Sientífiku aprova ho kondisaun Regulamentu Internu Konsellu nian ne’ebé sai matadalan durante sira nia mandatu.
Iha oportunidade hanesan, II Vise-Prezidente Konsellu Ezekutivu INCT, Dr. Augusto Conceição Soares halo aprezentasaun progresu ezekusaun orsamentu jeral 2023 no Planu Asaun Anual 2024 nian. Nia informa katak, oras ne’e daudaun INCT ezekuta ona orsamentu ho pursentu 57% inklui obligasaun no Planu Asaun Anual 2024, Institutu prevê orsamentu ba programa rua hanesan Edukasaun no Formasaun no Boa Governasaun no Jestaun Instituisional.
Partisipa iha reunaiun ne’e membru Konsellu Sientífiku Dr. Valentim Ximenes, Dr. Dionisio Babo, Dra. Terezinha Albertina Soares no ekipa tékniku INCT.