Díli, 31 Agusto 2023 – Institutu Nasionál Siênsia no Teknolojia (INCT, sigla iha Português) hala’o reuniaun Konsellu Jerál ba dahuluk ne’ebé prezide hosi Prezidente Konsellu Jerál, Sua Exa. Ministru Ensinu Superior, Siênsia no Kultura (MESSK), Dr. José Honório da Costa Pereira Geronimo, iha salaun enkontru MESSK, Kolmera.
Objetivu hosi reuniaun ne’e atu introdus membru Konsellu Jeral, halo apresiasaun no aprovasaun ba regulamentu internu Konsellu Jeral nian, aprezentasaun lista membru Konsellu Sientifiku no Fiskal ne’ebé sei aprova hosi membru Konsellu Jeral sira no halo aprezentasaun progresu ezekusaun Orsamentu Jeral Estadu tinan fiskál 2023 hosi II Vise-Presidente Konsellu Ezekutivu INCT, Dr. Augusto da Conceição Soares.
Iha sorumutu ne’e, Ministru Ensinu Superior, Siênsia no Kultura (MESSK), Dr. José Honório da Costa Pereira Geronimo halo aprovasaun ba regulamentu Konsellu Jeral, lista naran Konsellu Sientifiku no Konsellu Fiskal ba mandatu tinan haat (4) nian. Nia mos afirma tan katak sei apoiu servisu tomak INCT nian.
Iha tempu ne’ebé hanesan, II Vise-Presidente Konsellu Ezekutivu, Dr. Augusto Conceição Soares aprezenta progresu ezekusaun orsamentu Jeral Estadu 2023, rezumu jeral ba programa tinan haat (4) nian, rezumu jeral ba ezekusaun OJE tinan haat (4), programa INCT tinan 2023 nian, kronograma terseiru no kuartu trimestre, dadus rekursu umanu, dadus inventarizasaun no dezafiu enfrentadu sira.
Partisipa iha reuniaun ne’e Membru Konsellu Jeral, Prezidente Konsellu Ezekutivu INCT, Dr. Jose Cornelio Guterres, I Vise-Presidente Konsellu Ezekutivu INCT, Dr. Valentim Ximenes, Dr. Feliciano Quintas do Céu, Dr. Xisto Martins, Dr. Alberto C. Araújo, Sekretaria Ezekutiva INCT, Dra. Maria Elsa Diogo Correia no tekniku sira.