Díli, 18 Agostu 2023 – Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português), Dr. José Cornélio Guterres, partisipa iha Reuniaun Konsellu Reitores, ne’ebe prezide husi Sua Exa. Ministru Ensinu Superior, Siênsia no Kultura (MESS), Dr. José Honório da Costa Pereira Geronimo, iha salaun Novo Turismo, Bidau Lecidere.
Objetivu iha reniaun ne’e atu ko’alia kona-ba indikasaun membru hodi integra ba konsellu jeral INCT, estebelesimentu komisaun koordenadora ba universidade no institutu superior, lansamentu sistema jestaun dadus ensinu superior Timor-Leste nian.
Iha enkontru ne’e, Ministru Ensinu Superior, Siênsia no Kultura (MESSK) rona mos hanoin sira hosi Konsellu Reitores kona-ba ideia hodi dezenvolve Ensinu Superior ho kualidade ne’ebe di’ak liu iha futuru.
Iha okaziaun ne’e mos, Presidente Konsellu Ezekutivu INCT, Dr. José Cornélio Guterres aprezenta membru foun rua (2) ba Sua Excia. Ministru Ensinu Superior, Siênsia no Kultura (MESSK) hodi kompleta kompozisaun estrutura Konsellu Jeral INCT nian. Membru na’in rua ne’e mak Dr. Sixtu Martins hosi Universidade da Paz (UNPAZ) no Dr. Feliciano Quintas hosi Universidade Nasional Timor-Loro Sa’e (UNTL). Ho naran ne’ebe aprezenta ona, Ministru Ensinu Superior, Siênsia no Kultura (MESSK), Dr. José Honório da Costa Pereira Geronimo aseita no hetan kedas aprovasaun hosi Konsellu Reitores.
Partisipa iha enkontru ne’e Diretora Jeral Ensinu Supérior no Siénsia, Maria Filomena Lay Guterres, Direitor Jeral Administrasaun Finansas MESSK, Sr. Hernani Vitervo da Costa Soares, Diretur Ezekutivu ANAAA, Dr. Nilton Paiva, Reitores sira no tekniku sira hotu.