Lautem, 27 Jullu 2023 – Diretor Nasional Siênsia Ezata no Siênsia Naturais, Institutu Nasionál Siênsia no Teknolojia (INCT), Gregorio Rangel, M.Sc. hamutuk ho ekipa halo monitorizasaun ba peskiza sientífika rua (2) hanesan ba Dra. Brigida A. Correia kona-ba “A Produtividade do Sorgo Bioguma Sob Efeito do Cultivo Intercalado com Diferentes Linhas de Legume Clitoria Ternatea cv Milgara e na Produção dos Produtos Caseiras” iha Aldeia Titilari no ba Dr. Agusto Barros, kona-ba “Designing An Innovative Feed Planning System for Smallholder Bali Cattle (Bos Javanicus) Farmers in Lospalos, Lautem, Timor-Leste”.
Atividade monitorizasaun ne’ebe hala’o hosi ekipa INCT iha Lospalos n’e ho objetivu atu observa direta peskiza sientítika ne’ebé hala’o hosi peskizador no akompaña prosesu implementasaun tomak iha terenu hodi garante kualidade investigasaun sientifika sira ne’e.
Iha sorumutu entre Diretor Nasional INCT, Gregorio Rangel, M.Sc. ho Dirétor Rekursu Umanu Administrasaun Munisipiu Lautem, nia informa katak kada tinan Institutu fo biban ba peskizadór sira husi nivel Institutu Ensinu Superior hodi submete proposta peskiza no ikus mai iha peskiza sientifiku 12 mak pasa hodi realiza peskiza sientifika iha tinan fiskal ne’e. Munisipiu Lautem iha vantajen boot tanba iha investigasaun sientifika tolu (3) mak realiza iha munisipiu ida ne’e hosi peskizadora Dra. Brigida A. Correia, peskizadór Dr. Augusto Barros no peskizadór Dr. Rui Daniel. Nia salienta liu tan katak, peskiza experimental ne’e nesesita tebes halo implementasaun hodi hetan dadus hosi rezultadu e’ebe di’ak liu.
Investigador, Dr. Agusto Barros hatete sira nia ekipa halo investigasaun ne’ebé liga ho du’ut ba hahan karau nian ne’ebé hare liu ba proteina, karbohyrate, vitamina (kompozisaun botaniku) ne’ebé iha influensia ba kuidadu no produsaun karau vaka no mos kalendariu apropriadu hodi fo han karau tuir nia tempu. Peskiza ida ne’e inisia ho enkontru sosializasaun ho lider komuniatria no informa atividade ba lider munisipal sira, rekolla amostra, prosesa iha laboratoriu hodi hatene kle’an kona-ba potensia tipu du’ut ne’ebé sai hanesan ai-han prinsipal hodi hasa’e kresimentu animal nian iha postu administrativu Lopspalos, atu nune’e rekomenda ba Ministerio relevante hodi toma konsiderasaun iha future.
Peskiza ne’e hetan partisipasaun hosi estudante estajiariu Fakuldade Agrikultura UNTL no peskizadór sira iha Munisipiu Lautem.