Orgaun Konsellu Ezekutivu Institutu Nasionál Siênsia no Teknolojia (INCT, sigla iha Português), hala’o reuniaun ho Diretor Ezekutivu Ajensia Nasional ba Avaliasaun no Akreditasaun Akadémika (ANAAA, sigla iha Portugues), Dr. Nilton Paiva atu diskute hamutuk kona-ba peskiza ne’ebe sei hala’o hamutuk entre instituisaun rua (2) ne’e kona-ba “Taxa da Empregabilidade dos Graduados em Timor-Leste”. Enkontru ne’e lidera hosi Prezidente Ezekutivu INCT, Dr. José Cornélio Guterres, iha sala enkontru INCT.
Iha intervensaun, Presidente Ezekutivu INCT apresia no agradese ba ANAAA tanba bele koopera ho INCT hodi halo peskiza refere. Nia mos hatutan, INCT nia misaun prinsipal mak atu halo promosaun ba investigasaun sientífika sira tantu iha peskiza bazika no aplikada. Nia haktuir, INCT mos halo ona peskiza ho instituisaun rai laran hanesan Fundu Dezenvolvimentu Kapital Umanu (FDCH) no rai liur hanesan Singapore University of Social Science (SUSS) no University of Kanazawa, Japan. Atu termina, Prezidente solisita ba parte rua atu asina uluk Memorandum ida hodi sai nu’udar parseiru servisu iha area peskiza, antes hakat ba prosesu tuir mai no nia kompremete sei prepara rekursu ne’ebe di’ak iha peskiza ida ne’e no sei envolve ativamente ANAAA iha prosesu tomak.
Iha sorin seluk, Direitur Ezekutivu ANAAA, Dr. Nilton Paiva apresia no agradese tebes ba enkontru ida ne’e no explika objetivu hosi peskiza ne’e atu rekolla dadus kona-ba estudante sira ne’ebe gradua ona nomos atu hare area servisu ne’ebe sira haknaar aan ba pertense dunik ka lae ba sira nia area estudu. Tanba bainhira ANAAA halo avaliasaun sempre mosu pergunta, kona-ba kontinuidade estudante sira nian wainhira termina estudu ida, tantu iha Sentru Formasaun ka Universidade sira. Atu remata, Ezekutivu ne’e hatete, dadus peskiza ne’e sei aprezenta ba Universidade no Painel Project sira.
Partisipa iha reuniaun ne’e I no II Vise-Prezidente Konsellu Ezekutivu INCT, Dr. Valentim Ximenes no Dr. Augusto da Conceicao Soares, Diretores INCT no ekipa tekniku ANAAA.