Díli, 26 Jullu 2023 – Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português), Dr. José Cornélio Guterres, hamutuk ho I no II Vise-Prezidente Konsellu Ezekutivu INCT, Dr. Valentim Ximenes no Dr. Augusto Soares no akompaña mos husi Sekretaria Ezekutiva INCT, Dra. Maria Elsa Diogo Correia hala’o enkontru ho Sua Exa. Ministru Ensinu Superior no Siênsia (MESS), Dr. José Honório da Costa Pereira Geronimo, iha sala enkontru MESS, Kolmera.
Objetivu husi enkontru ne’e atu informa situasaun atual no progresu servisu INCT nian ba Sua Excelensia durante iha tinan fiskal 2019 to’o tinan 2022 nomos informaprograma atual tinan fiskal 2023.
Iha intervensaun, Prezidente Konsellu Ezekutivu INCT, Dr. José Cornélio Guterres halo introdusaun no hatete, INCT hanesan institutu públiku ida ne’ebé mak estabelese iha Dekretu Lei n⸰. 23/2014 ho nia misaun mak atu promove siénsia, teknolojia no inovasaun liu-hosi peskiza no tutela iha MESS. No institutu ne’e mos kompostu ho orgaun konsellu lima (5) hanesan Konsellu Jeral, Konsellu Ezekutivu, Konsellu Sientífiku, no Konsellu Fiskal no Konsellu Konsultivu.
Iha tempu hanesan II Vise Presidente Konsellu Ezekutivu INCT, Dr. Augusto Soares halo kedas aprezentasaun kona-ba programa no orsamentu INCT nian durante tinan 4 hahu hosi tinan fiskal 2019 to’o tinan 2023 ne’ebe mak oras ne’e la’o hela.
Hafoin rona tiha aprezentasaun hirak ne’e, Sua Exa. Ministru Ensinu Superior no Siênsia (MESS), Dr. José Honório da Costa Pereira Geronimo fo apresiasaun ba Konsellu Ezekutivu INCT ba progresu ne’ebe di’ak no husu atu kontinua servisu di’ak liu tan hodi nune’e bele atinji misaun INCT nian. Nia mos hatutan tan katak sei apoiu maximu servisu INCT nian liu-liu iha rekursu umanu no fasilidade seluk sira seluk.
Partisipa iha enkontru enkontru ne’e I no II Vise Presidente INCT, Sekretaria Ezekutiva INCT, Xefe Departamentu Rekursu Umanu, Tekniku INCT no MESS.