Díli, 29 Novembru 2022 – Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português), Dr. José Cornélio Guterres, akompaña hosi I no II Vise-Prezidente Konsellu Ezekutivu INCT, Dr. Valentim Ximenes no Dr. Augusto Soares hala’o asinatura Memorandu Entendimentu ho Institutu Superior Cristal (ISC) iha área investigasaun sientífika no mapeamentu siénsia. Serimonia ne’e realiza iha sala auditorio mestrado ISC, Balide.
Presidente Konsellu Ezekutivu INCT, Dr. José Cornélio Guterres iha nia intervensaun hatete, objetivu hosi sorumutu ida ohin atu asina Memorandu Entendimentu (MOU) entre INCT ho ISC no hala’o mapamentu siénsia, espesifikamente atu halo kolesaun ba dadus institutu nian kona-ba ba perfil institutu, dosente sira, biblioteka, sentru peskiza no laboratoriu, ne’ebe aliña ho misaun INCT katak atu promove siénsia, teknolojia no inovasaun avansada iha Timor-Leste liu-hosi dezenvolve peskiza puru no aplikada, inventarizasaun no formasaun, publikasaun, akreditasaun no katalogasaun koñesimentu sientífiku tuir planu estratejiku INCT 2022 no ODS ONU 2030 nian.
Presidente Konsellu Ezekutivu INCT ne’e hatutan tan Mapamentu ba Siénsia ne’e nia objetivu hodi ajuda Institutu Ensinu Superior hodi hametin, haforsa liu tan sentru peskiza, laboratoriu no biblioteka Ensinu Superior sira. Sentru peskiza no laboratoriu peskiza nu’udar fuan ba Ensinu Superior atu hodi sai komunidade akademiku ida kritiku hodi fornese dadus ba Governu sira no hamosu siénsia foun.
Partisipa iha seremonia ne’e Prezidente Executivo Fundasaun Cristal Dr. Agostinho dos Santos Gonçalves, Magnifiku Reitor ISC, Dr. Agostinho dos Santos Gonçalves, Dekanu Fakuldade Siénsia Edukasaun, Vise Dekanu FCE, Dekana Fakuldade Siénsia Saúde, Xefe IQA, Xefe Departamentu FCE no FCS Dosente, Tekniku INCT no Estudante sira.