Díli, 13 Jullu 2023 – Institutu Nasional Siênsia no Teknolojia (INCT, sigla iha Português) hamutuk ho ekipa South Asia Neighborhood Network (SEANNET) iha Timor-Leste hala’o aprezentasaun preliminariu rezultadu peskiza “The Role Of Neighborhoods In The City’s Envariomental Sustainbility” iha instalasaun INCT, Balide.
Objetivu hosi aprezentasaun ne’e atu hato’o rezultadu peskiza ne’ebé durante ne’ebé realiza hosi investigadora Dra. Hendriketa no Dra. Aderita kona-ba komunidade sira ne’ebé hela iha área risku hanesan iha mota ninin Comoro nian. Iha sorin seluk, peskiza ne’e mos atu hare kona-ba komunidade sira nia abitu/kostume ho ambiente iha fatin sira hela ba. Ou seja, atu hare kona-ba maneira sira komporta ho ambiente wainhira soe lixu/foer. Entretantu, peskiza ne’e hala’o ba komunidade iha aldeia Fomento 1, Fomento 2 no aldeia Moris Foun ne’ebé konsidera hanesan área refere risku tebes.
Partisipa iha serimonia ne’e Prezidente Ezekutivu INCT, Dr. José Cornélio Guterres, I no II Vise-Prezidente Ezekutivu, Dr. Valentim Ximenes no Dr. Augusto da Conceição Soares, Sekretária Ezekutiva, Dra. Maria Elsa D. Correia, Diretor Nasional INCT nian, reprezentante hosi liña ministerial, lider komunitaria, reprezentante komunidade, profesor, delgadu no xefe juventude aldeia nian no tékniku sira.