Dili, 10 Jullu 2023, Estrutura Másimu Institutu Nasional Siênsia no Teknolojia (INCT, sigla iha Português), hala’o enkontru ho Instituto Nasional Formasaun ba Dosentes Profesionais Edukasaun (INFORDEPE) kona-ba estensaun akordu ba utilizasaun edifisiu INFORDEPE ne’ebe mak durante ne’e INCT uza.
Prezidente INFORDEPE, Sr. Manuel Gomes iha nia intervensaun apresia ho inisiativa INCT atu formaliza dokumentu ida ne’e, nune’e hodi uza espasu no fasilidade husi INFORDEPE nian iha forma legal. Nia mos agradese prezensa INCT nian durante iha ne’e no halo kooperasaun di’ak.
Prezidente Konsellu Ezekutivu INCT, Dr. José Cornélio Guterres hodi INCT nia naran hato’o obrigadu wa’in ba Prezidente INFORDEPE, Vise no Asesora sira hodi halo extensaun kontratu ida ne’e. Asina Memorandu Entendimentu ida ne’e ami apresia tebes hanesan ajuda ida ne’ebe labele sura ho liafuan tanba fo tan espasu no mos dala ruma uza mos ho salaun Ian Martin.
Tuir akordu ne’ebe asina entre parte rua, INCT sei utiliza edifisiu Infordepe durante tinan rua (2) tan, ou seja, to’o iha tinan 2025.
Enkontru ne’e realiza iha sala INFORDEPE no partisipa hosi I Vise-Prezidente Konsellu Ezekutivu INCT, Dr. Valentim Ximenes, II Vise-Prezidente INCT, Dr. Augusto Soares, Xefe Departamentu INFORDEPE no tekniku sira.