Dili, 9 Juñu 2023 – Prezidente Konsellu Ezekutivu Institutu Nasional Siensia no Teknolojia (INCT, sigla iha Português) hamutuk ho estrutura halo reuniaun ho Investigador sira hosi Universidade Kanazawa Japan hodi halo preparasaun ba peskiza ne’ebe sei realiza iha Aeroportu Internasional Nicolau Lobato, Comoro.
Enkontru ne’e ho objetivu atu diskute preparasaun ba kestionariu sira no ekipa tekniku sira ne’ebe sei akompaña investigador sira. Topiku ba peskiza ne’e mak “Basic Analysis of Trend in Tourist Arrivals and Depatures in Timor-Leste”, ne’ebe antes ne’e asina ona iha akordu entre parte rua ne’e.
Objetivu prinsipal hosi tema ne’e mak atu hatene dadus turista rai-liur (estranjeiru) tama no sai iha teritoriu Nasional, ho nune’e iha futuru atu promove no dezenvolve industria turizmu iha Timor-Leste. Peskiza ne’e hala’o durante loron rua (2) hosi Investigador sira rasik no akompaña hosi Diretor Nasional no tekniku INCT rasik.