Díli, 5 Maiu 2022 – Institutu Nasionál Siênsia no Teknolojia (INCT, sigla iha Português) hala’o reuniaun ho Avaliador (Doutoradu) sira ho objetivu atu halo introdusaun ba preensimentu formatu avaliasaun ba kandidatu faze 2ª edital INCT nian ba konkursu investigasaun sientífika tinan fiskal 2023, ne’ebe prezide hosi Prezidente Konsellu Ezekutivu INCT, Dr. José Cornélio Guterres iha sala reuniaun INCT, Balide.
Prezidente Konsellu Ezekutivu INCT iha nia intervensaun hatete, tinan ida ne’e INCT loke konkursu públiku ba fundu investigasaun sientífika. Faze dahuluk avaliasaun kurikular konkluí tiha ona, agora tama ba faze daruak nune’e presiza avaliador sira ne’ebe mak iha esperiensia no iha koñesimentu di’ak iha área espesialidade sira. Tanba ne’e INCT konvida avaliador ho nivel akademiku Doutoradu sira atu bele fo hanoin di’ak hodi avalia proposta proposta peskiza hosi konkorente sira. Nune’e mos Investigador Senior Internasional, Dr. Filipe Couto halo aprezentasaun kona-ba formatu avaliasaun, liu-liu ligadu ho valor ne’ebe avaliador sira sei fo ba konkorente sira.
Partisipa iha reuniaun ne’e I Vise-Prezidente Konsellu Ezekutivu INCT, Dr. Valentim Ximenes, Komisaria ba Étika, Sra. Jacinta dos Santos Guterres, Avaliador ba Investigasaun Sientífiku, Dr. Dionisio Babo, Dra. Maria da Costa, Dr. Valente da Silva, Dr. Krispin Fernandes, Dr. Hanna Sidjabat, Dra. Therese Tam Nguyen, Dr. Carlito Malicode, Dra. Hellen Hill, Dra. Armando Boa Mau Afonso, Dr. Junior Raimundo da Cruz, Dr. Cancio Monteiro, Dra. Carla A. J. Costa, Dra. Aderita dos Santos, Dr. Domingos Pinto, Dr. Helio Xavier, Dr. Manuel Brito, Dr. Alfredo dos Santos no Dr. Mateus Pinheiro.