Díli, 18 Abril 2022 – Institutu Nasionál Siênsia no Teknolojia (INCT, sigla iha Português) hala’o serimónia Tomada de Posse ba Prezidente Foun Konsellu Ezekutivu INCT, Dr. José Cornélio Guterres ba período 2023-2027, iha Salaun Tower-Fatuhada.
Presidente Konsellu Ezekutivu INCT, Dr. José Cornélio Guterres iha nia intervensaun hatete ohin ita hala’o serimonia tomada de posse ba atan ha’u, nu’udar Prezidente Konsellu Ezekutivu INCT ne’ebe hetan re-eleitu hosi Konsellu Jeral iha 12 abril 2023. Ne’e hanesan momentu importante ida hodi hala’o kna’ar no misaun INCT nian ho responsabilidade no profisional.
Nia mos hatutan, sei kontinua hala’o programa estratejiku sira iha periodu tinan 4 tuir mai hodi garantia nafatin misaun INCT nian, kontinua atribui fundus peskiza ba área prioritariu sira liu-liu iha área hanesan Inovasaun, Teknolojia no Infraestrutura; Edukasaun, Dezenolvimentu Umanu no Inkluzaun sosial; Saude no Bem Estar; Ekonomia, Agrikultura, Turizmu, Komersiu no Industria; no siensia Ambiental, Bioadiversidade no Mudansa Klimatika. Nune’e atu responde ba dezafiu fundu ba peskiza sira, INCT sei esforsu buka fundu hosi ajensia nasional no internasional atu fasilita peskiza aplikada sira sein dependensia de’it ba orsamentu governu. Alende ne’e kontinua mos disemina rezultadu peskiza sira no konsolida rekursu potensial hanesan peskizador sira atu produs peskiza sira ho kualidade, tanba iha tinan 2023 ne’e, INCT sei halo fali estudu avaliasaun ida hodi hatene kona-ba utilizasaun rezultadu peskiza.
Prezidente eleitu ne’e hatete INCT sei kria instrumentu legal balun inklui Dekretu lei ka lei parlamentar ba implementasaun STI, dekretu lei atu regula peskizador nasional no internasional sira, lei finanseira no dudu implementasaun lei depozitu legal hodi hetan ISSN ba Timor-Leste. Bazeia lei depozitu legal ne’ebe aprovadu ona, liu husi exelensiu ministru MESCC sei koordena ho MNEC atu hakerek karta ba UNESCO Paris atu kontinua prosesu hodi hetan ISSN.
Iha hau nia mandatu sei kontinua nafatin dudu politika STI ba oin, senbiliza ba entidade desizor hotu-hotu katak “estudu nudar Espiritu ba Dezenvolvimentu.” Presiza kria dekretu/Lei parlamentar ba implementasaun STI, preve fundus ba peskiza hahu husi 0,25 % husi GDP, aumenta to’o 1% hafoin 5 ba leten, alende fundu ba peskiza husi ajensia nasional no internasional sira. Sei instala software repozitoriu dijital hodi armazena material sientifiku sira husi IES sira, rezultadu peskiza sira no dokumentu governmental sira.
Ikus liu, prezidente ezekutivu INCT, komprometidu sei konsolida nafatin rekursu umanu iha INCT nia laran, peskizador sira, parseiru nasional no internasional atu hala’o misaun INCT di’ak liu tan tuir planu estratejiku nasional Timor-Leste (2011-2030) no Objetivu Dezenvolvimentu Sustentavel Nasoens Unidos nian (2030).
Iha sorin seluk Sua Excia. Ministru Ensinu Superior, Siênsia no Kultura (MESSK), Longuinhos dos Santos hateten iha serimonia tomada de posse ba segundu mandatu Presidente Konsellu Ezekutivu INCT katak iha tinan 2019 kria ona pozisaun INCT nian ne’ebe asume papel hodi dezenvolve pais liu-hosi peskiza atu bele identifika problema dezafiu sira para atu bele hetan nia solusaun ba área sira hanesan edukasaun, saúde, meiu ambiente, ekonomia, agrikultura no iha área seluk-seluk tan. Tan ne’e mak iha oportunidade ida ne’e, maske INCT hasoru dezafiu barak maibe konsege ultrapassa dezafiu hirak ne’e hodi bele dezenpeña liu-liu servisu institusaun nian ne’ebe lao ho diak.
Nia mos hatutran, iha ninia mandatu VIII Governu Konstitusional, nia observa buat rua ne’ebe sai hanesan mukit ka dezafiu bo’ot hanesan rekursu umanu no finasiamentu. Maibe Sua Excelensia konsentra maximu ba INCT no konsege estabelese orgaun governativa INCT nian no tau orsamentu ba iha planu no programa INCT nian hodi bele promove no dezenvolve peskiza iha área oin-oin. Tan ne’e, hau hakarak hato’o parabéns ba Presidente Konsellu Ezekutivu, Vise nain rua, direjente no funsionariu sira ba imi nia servisu iha tinan anterior.
Nia mos haforsa tan atu INCT kontinua dezenvolve no promove investigasaun sientífika iha ita nia pais. Importante tebes atu informa katak investigasaun sientífika ne’e influensia makas liu ba infraestrutura, rekursu umanu no finansiamentu tanba investigasaun Sientífika nu’udar atividade importante ba dezenvolvimentu iha kualker pais no fortalese ekonomia.
Tanba ne’e segundu mandatu ida agora dadauk ne’e iha oportunidade ba INCT atu reforsa atividade sira hodi promove peskiza nomos inovasaun iha ita nia pais. Ho nune’e, “há’u hakarak fo parabéns dala ida tan ba Prezidente Konsellu Ezekutivu INCT nian ho estrutura tomak ba imi hotu nia servisu di’ak iha tinan kotuk no ohin asume fila-fali para atu dezenvolve institusaun ida ne’e atu bele la’o ho di’ak no bele promove di’ak liu tan ita nia peskiza tanba timor oan sira mak bele deskobre problema iha pais ne’e no timor oan sira mak bele buka nia solusaun ba problema hira ne’ebe ita nia pais hasoru liu-hosi peskiza.
Partisipa iha seremonia tomada de posse ne’e Komisaria Komisaun Funsaun Públika, Sra. Maria de Jesus Sarmento, Diretor Instituisaun Autònomu sira, Reitor/a sira, Membru Konsellu Jeral, Membru Konsellu Sientífiku, Membru Konsellu Fiskal, padre, madre, dirijente hosi linha ministerial, administrador munisipiu no funsionariu INCT rasik.