Díli, 20 Abril 2022 – Institutu Nasionál Siênsia no Teknolojia (INCT, sigla iha Português) hala’o reuniaun extraordinária Konsellu Jeral iha ambitu hodi halo Eleisaun Prezidente Konsellu Ezekutivu INCT ba period 2023-2027. Reuniaun ne’e prezide hosi Prezidente Konsellu Jerál, Sua Excia. Ministru Ensinu Superior, Siênsia no Kultura (MESSK), Sr. Longuinhos dos Santos, iha Hotel JL Villa, Aimutin.
Tuir ajenda ne’ebe iha, antes halo eleisaun ba Prezidente INCT foun, Presidente Konsellu Jeral hamutuk ho membru sira, halo avaliasaun kurikular (CV) kandidatura sira nian no aprova prosedimentu eleisaun nian.
Kandidatu ba Prezidente INCT ne’e mak Dr. José Cornélio Guterres, Dr. Valentim Ximenes no Dr. Augusto Conceicao Soares, ne’ebe mak hili hosi Prezidente Konsellu Ezekutivu INCT no hetan nomesaun hosi Prezidente Konsellu Jeral no Membru Konsellu Jeral, tuir estatutu ne’ebe mak vigora.
Entretantu, iha prosesu eleisaun ne’e, kandidatu Dr. Jose Cornelio Guterres no Dr. Valentim Ximenes mak halo sira nia aprezentasaun hodi hato’o programa no kandidatu Dr. Augustu Soares deside hodi retira hosi kandidatura ne’e, maibe pronto atu servisu hamutuk ho Prezidente eleitu.
Nune’e, tuir prosesu demokratiku, membru konsellu jeral sira halo votasaun, no rezultadu hatudu katak, kandidatu Dr. Jose Cornelio Guterres, total votu lima (5) no Dr. Valentim Ximenes total votu ida(1).
Marka prezensa iha reuniaun ne’e maka Prezidente Konsellu Jeral, Sua Excia. Ministro Longuihos dos Santos, Membru Konsellu Jeral, Dr. José Cornelio Guterres, Dr. Acácio Cardoso Amaral, Dr. Alvaro M. Amaral, Pe. Agostinho de Jesus Soares, Dr. Vicente Paulo Correia, Dr. Valentim Ximenes, Dr. João Fernandes, Kandidatu Konsellu Ezekutivu, Dr. Augustu Soares no tékniku hosi INCT no MESSK.