Díli, 21 Marsu 2022 – Institutu Nasionál Siênsia no Teknolojia (INCT, sigla iha Português) realiza enkontru Konsellu Fiskal ba daruak ho objetivu atu fiskalizasaun relatorios finanserio atividade INCT nian hahu hosi tinan 2019 to’o tinan 2022, ne’ebé prezide hosi Prezidente Konsellu Fiskal, Dra. Cecília de Asis, iha sala reuniaun INCT, Balide.
Presidente Konsellu Ezekutivu INCT, Dr. José Cornélio Guterres iha nia intervensaun hateten hanesan enkontru bain-bain ami hosi Konsellu Ezekutivu la interven iha prosesu ida ne’e, fo tomak kompentensia no tempo ba Konsellu Fiskal hodi halo nia servisu rasik. Presidente Konsellu Ezekutivu relata mos informasaun ba Konsellu Fiskal, tuir lei hateten antes Presidente Konsellu Ezekutivu nia mandatu hotu ou re-eleitu katak relatorio tinan ha’at INCT ninian antes atu lori ba Tribunal das Contas, Konsellu Jeral sei hetan parecer ou apresiasaun hosi Konsellu Fiskal. Alende ne’e II Vise Presidente Konsellu Ezekutivu, Dr. Augusto Soares, halo mos aprezentasaun badak konaba Relatorio INCT nian, hahu hosi tinan 2019, 2020, 2021 no 2022 hodi fasilita Presidente no Membru Konsellu Fiskal iha sira nia fiskalizasaun.
Presidente Konsellu Fiskal, Dra. Cecília de Asis no Membru Konsellu Fiskal Dr. Isidoro Viana da Costa hateten hafoin ami halo tia leitura bá relatórius hosi tinan 2019 to’o tinan 2022 hosi Konsellu Ezekutivu INCT ami aprezenta ami nia respeitu no devidas konsiderasoens, testemunha bá devidu valor no importânsia bo’ot bá relatórius refere ne’ebe aprezenta hosi INCT, hanesan instituisaun ida ho ninia importânsia bá iha prezente no futuru, além de sai mos motiva no promotor bá atividades téknikus sientistas no responsável institusional no espasu atividade motivadora bá ezersísiu organizativu no administrativa polítiku bá dezenvolvimentu povu no Estadu nian. Presidente Konsellu Fiskal ne’e hatutan tan relatóriu hirak ne’e, teknikamente no estruturalmente elaboradu ho diak tebes, responsavelmente atu informa ho klareza no presiza hodi bele reflete vida institusional no organizasional INCT nian. Nune’e Pareser téknikamente hetan aprovasaun hosi ami Dra. Cecília de Assis, nu’udar Prezidente Konselhu Fiskal no Dr. Isidoro da Costa Viana, nu’udar membru Konsellu Fiskal.
Sekretaria Ezekutiva INCT, Dra. Maria Elsa Diogo Correia hato’o mos informasaun ba konsellu fiskal katak, INCT hahu hosi tinan 2019 – 2020 institusaun ida ne’e seidauk goza lolos nia plan autonomia ba finanseira administrativa no patrimonial. INCT foin goza lolos nia plan ba autonomia finanseira sira iha tinan 2021. Nune’e Sekretaria Ezekutivu relata tan informasaun ba konsellu fiskal katak INCT iha nia Planu Asaun Anual, wainhira institutu ne’e rasik halo nia programa ba atividade, entaun INCT prepara nia proposta depois envia ba Ministeiru Ensino Superior, Siensia no Kultura (MESSK) hodi prosesa orsamentu ba atividade INCT sira.
Partisipa iha enkontru ne’e, Presidente no membru Konsellu Fiskal, Estrutura Maximu INCT, Xefe Divizaun Planeamentu no Rekursu Umanu, Asesora Jurídiku INCT no Tékniku sira hosi INCT.