Díli, 9 Marsu 2023 – II Vise Konsellu Ezekutivu INCT, Dr. Augusto Soares, Akompaña hosi Xefe Divizaun Planeamentu INCT, Sr. Calistro Maria Correia partisipa iha enkontru trimestrál daha’at ba asuntu sosial ho nia tema “Hametin kordenasaun efektivu kontribui ba kapasitasaun dezenvolvimentu institusional ho sustentavel tinan 2023”, ne’ebe mak prezide hosi Sua Excelênsia Vise-Primeira Ministra ba Asuntu Sosiál, Atuál Ministra Solidariedade Sosiál no Inkluzaun, Sra. Armanda Berta dos Santos iha sala enkontru VPM-MSSI, kaikoli.
Objetivu hosi enkontru ne’e atu harmoniza planeamentu intregadu liu husi kordenasaun efetivu hamutuk ho liñas ministériais sira ne’ebe hamahan an iha setor sosial kada trimester hanesan exersisiu no pratika diak hodi aprezenta rezultadus prinsipal ne’ebe atinji ona, rekomendasaun no obstaklus ne’ebe hasoru iha trimester ikus husi Outobru-Dezembro 2022.
II Vise Konsellu Ezekutivu INCT, Dr. Augusto Soares hateten Instituto Nasional Siénsia no Teknolojia (INCT) hetan konvite ofísial ida hosi Gabinete Primeira Ministra ba asuntu sosial hodi partisipa iha enkontru trimestrál ba daha’at. INCT hanesan mos institusaun ne’ebe tutela ba iha Ministeriu Ensino Superior, Siénsia no Kultura (MESSK) ne’ebe tama mos iha asuntu sosial, ne’ebe maka kada trimester sempre ba halo aprezentasaun no hato’o nia progresu, dezafiu no rekomendasaun ba ita nia Sua Exelensia Vise Primeira Ministra, Sra. Armanda Berta dos Santos ne’ebe maka responsabiliza ba iha area sosial. Ohin entidade sira ne’ebe direita no indireita ne’ebe relevante iha área sosial hasoru malum ho Excelênsia Vise Primeira Ministra hodi hato’o rezultadu programa prinsipal 5 ne’ebe atinji, obstaklu ne’ebe hasoru no rekomendasaun. Entertantu INCT nia partisipasaun ohin iha enkontru ne’e hato’o mos 5 prioridades programa ne’ebe INCT atinji ona, obstaklu no dezafiu sira no rekomendasaun iha trimester ikus tinan 2022.
Partisipa maximu iha enkontru trimestrál daha’at ne’e husi Ministériu no Instituto sira hanesan: Ministru Edukasaun Sr. Armindo Maia, Ministériu Ensinu Superior, Siénsia no Kultura reprezenta husi Diretór Jerál, Vise-Ministra Solidariedade Sosiál no Inkluzaun, Signi Verdial; Vise-Ministru Saúde, Sr. Bonifácio Mau Coli dos Reis; Sekretáriu Estadu Arte no Kultura, Sr. Teófilo Caldas, Sekretáriu Estadu Igualdade no Inkluzaun, Sra. Maria do Rosário Fátima Correia no reprezentante Sekretáriu Estadu Juventude no Desportu.