Díli, 31 Janeiru 2023 – Funsionárius Divizaun Aprovizionamentu, Finansas no Planeamentu hosi Institutu Nasionál Siênsia no Teknolojia (INCT, sigla iha Português), partisipa iha formasaun konaba “Regime Jurídico do Aprovisionamento, dos Contratos Públicos e das Respectivas Infrações, Decreto-Lei n.º 22/2022, de 11 de Maio” ne’ebe prezide hosi I Vise Presidente Konsellu Ezekutivu INCT, Dr. Valentim Ximenes, iha sala enkontru INCT, Balide.
Objetivu prinsipal hosi formasaun ne’e atu disimina Dekretu-Lei Aprovisionamentu n.º 22/2022 ba funsionárius INCT sira, liu-liu ba iha servisu divizaun Aprovisionamentu, Finansas no Planeamentu atu bele lao tuir regras prosesu ne’ebe iha ona.
I Vise Presidente Konsellu Ezekutivu INCT, Dr. Valentim Ximenes iha nia intervensaun hato’o agradesimentu ba CRA-Timor-Leste bele fo ona formasaun ba funsionárius INCT nune’e bele hasae sira nia koñesimentu, kapasidade atu bele hatene oinsa bele ezekuta lolos prosesu hotu tomak lao tuir regras ne’ebe mak iha ona dekretu lei aprovisionamentu refere.
Formasaun ne’e hanesan faze inisiu INCT servisu hamutuk ho CRA-Timor-Leste, formador sira ne’ebe fo formasaun mak hanesan Dr. João Serra, Dr. Zeca Neves no Tomé Babo. Partisipa máximu hosi II Vise Presidente Konsellu Ezekutivu INCT, Dr. Augusto Soares, Sekretaria Ezekutiva INCT, Dra. Maria Elsa Diogo Correia no Xefes Devizaun sira.