Díli, 29 Novembru 2022 – Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português), Dr. José Cornélio Guterres, akompaña hosi I Vise-Prezidente Konsellu Ezekutivu INCT, Dr. Valentim Ximenes hala’o asinatura Memorandu Entendimentu ho Dili Institute of Technology (DIT) iha área investigasaun sientífika no publikasaun.
Iha intervensaun, Reitor DIT, Dr. Álvaro Menezes Amaral, agradese ba prezensa hosi Konsellu Ezekutivu INCT no informa katak, ho asinatura memorandu ne’e bele kapasita liu tan ita nia dosente, estudante no reforsa diak liu tan ita nia servisu iha área investigasaun sientífika iha Timor-Leste.
Prezidente Konsellu Ezekutivu INCT, Dr. José Cornélio Guterres hatete, INCT nia misaun prinsipál mak atu promove siênsia, teknolojia no inovasaun iha País ida ne’e no nia prinsipál parseiru investigasaun sientífika mak dosente sira hosi Universidade Públiku ka Privada sira. Rezultadu hodi investigasaun sira ne’e sei utiliza hanesan referênsia ba komunidade akadémika sira no rekomenda mos ba Governu hodi formula sira nia polítika públika sira.
Informa tan katak, Institutu halo mos kooperasaun iha nível munisipiu hanesan Same, Baucau, Lospalos, Oecusse, Maliana, Ermera e Internasionál hanesan LIPI, University Singapore of Social Science. Atu termina, apela katak, dezenvolvimentu país ida nian tenke bazeia ba peskiza.