Díli, 21 Novembru 2022 – I Vise-Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português), iha tersa-feira ne’e simu Koordenadora Associate Professor Southeast, Asia Neighborhood Network (SEANNET), Dra. Rita Padawangi hosi Singapura. Enkontru ne’ebé prezide hosi I Vise-Presidente Konsellu Ezekutivu INCT ne’e ho objetivu atu diskute kona-ba peskiza ne’ebé sei realiza hamutuk ho Institutu.
Iha intervensaun, I Vise-Presidente, agradese prezensa hosi Dra. Rita Padawangi ninia hodi diskute kona-ba joint research ho INCT. Konsidera topiku peskiza “The Role of Neighborhoods in the City’s Environmental Sustainability” ne’e interesante no relevante tebes ho realidade iha País ida ne’e. Nune’e, nia dehan, “privilejiu ida hodi servisu hamutuk ho SEANNET iha âmbitu peskiza tanba papel INCT nian mak promove siênsia, teknolojia no inovasaun iha Timor-Leste”.
Investigadora Dra. Rita Padawangi, iha nia intervensaun informa, peskiza ida ne’e sei foka ba país sira ne’ebé iha faze dezenvolvimentu hanesan Indonesia (Surabaya), Filipina (Manila), Ho Chi Minh, Thailandia (Bangkok), Chiang Mai, Mandalay inklui Timor-Leste (Dili). Portantu, ami hakarak halo peskiza ligadu ho planeamentu teritóriu, espesialmente ba komunidade sira ne’ebé hela besik mota. Ami hakarak hatene papel sira nian iha sidade ida ne’e. Ho nune’e, sei envolve no halo interasaun diretamente ho sira.
Iha projetu investigasaun ne’e sei envolve peskizadora nain rua (2) – Dra. Hendriketa da Silva, hosi Universidade Nasionál Timor-Lorosa’e (UNTL) no Dra. Aderita T. dos Santos, hosi Dili Intitute of Technology (DIT). Estudu ne’e finansia hosi Singapore University of Social Sciences.
Partisipa iha enkontru ne’ebé realiza iha instalasaun INCT ne’e Sekretária Ezekutiva INCT, Dra. Maria Elsa D. Correia, Xefe Departamentu no tékniku sira.