Lautem, 25 Outubru 2022 – Konsellu Ezekutivu Institutu Nasionál Siênsia no Teknolojia (INCT, sigla iha Português), partisipa iha atividade kolleita Sorghum ho objetivu atu observa direitamente iha terenu kona-ba ninia produsaun hanesan ai-han alternativu ba ema no animál sira hanesan karau.
Produsaun hosi sorghum ne’e mai hosi projetu investigasaun ne’ebé INCT atribui ba Dra. Yuliaty Brito, ho titulu peskiza “Efeitu husi Adubu organiku feses karau ba produtividade Sorghum (Sorghum Bicolor L Moench)”, ne’ebé hahú iha fulan Maiu 2022.
Ko-investigadora, Dra. Brigida Antonia Correia, iha nia intervensaun hatete, ida ne’e hanesan programa ba dahuluk ne’ebé ita introdus iha Munisípiu Lautem. Objetivu hosi projetu ida ne’e atu hatene sientífikamente ninia prosesu produsaun, kresimentu nomós atu enkoraja maluk sira hotu hodi kultiva rasik. Sorghum ne’e rasik ita bele produs hanesan ai-han hodi subtitui fos, bele produs sai farina, masin-midar no bani-ben. Portantu, konsidera hanesan ai-han alternativu ba ema.
Presidente Konsellu Ezekutivu INCT, Dr. José Cornélio Guterres, iha nia intervensaun afirma, ligadu ho projetu estudu ne’e, presiza servisu hamutuk ho parseiru sira, liu-liu indústria, komunidade no Governu. Atu implementa projetu estudu ida ne’e ho industria sira, ita tenke hare volume produtu ne’e rasik. Entretantu, servisu ida ne’e sei naruk, liu-liu Governu tenke fasilita teknolojia ida ne’ebé avansadu. Atu termina, apela atu INCT mos tenke disemina ba komunidade sira hotu kona-ba benefisiu hosi sorgum, atu nune’e sira bele utiliza.
Partisipa iha atividade ne’e II Vise-Prezidente Ezekutivu INCT, Dr. Augusto Soares, Sekretáriu Autoridade Munisípiu Lautem, Diretor Jerál Ministério Agrikultura, Diretora Jerál Ministériu Ensinu Superior, Siénsia no Kultura (MESSK), Sekretáriu Rejionál Agrikultura RAEOA, Peskizadór sira, ekipa INCT no estudante hosi Fakuldade Agrikultura Universidade Timor Lorosa’e (UNTL).