Díli, 20 Abril 2022 – Institutu Nasionál Siênsia no Teknolojia (INCT, sigla iha Português) hala’o reuniaun Konsellu Jerál ba Dahitu ne’ebé prezide hosi Prezidente Konsellu Jerál, Sua Excia. Ministru Ensinu Superior, Siênsia no Kultura (MESSK), Dr. Longuinhos dos Santos, iha instalasaun INCT, Balide.
Objetivu hosi reuniaun ne’e atu aprezenta Planu Estratéjiku INCT 2022-2030 hosi Investigadór Internasionál, Dr. Filipe Couto no aprezentasaun relatóriu trimester datoluk hosi II Vise-Prezidente Konsellu Ezekutivu INCT, Dr. Augusto Soares.
Iha aprezentasaun, Dr. Filipe Couto hatete, tinan ida ne’e hanesan tinan atu Institutu rekolla, buka ninia identidade iha kontestu nasionál no internasionál, ho ida ne’e, Institutu dezenvolve elaborasaun Planu Estratéjiku ida ne’e. Konsidera hanesan Planu ida ne’ebé ambisiozu, detalladu no realista. Iha nia vizaun, misaun, prinsipiu no valor sira, nesesidade investigasaun sientífika, vizaun estratéjika, liña estratéjika no planu operasionalizasaun estratéjika.
Prezidente Konsellu Jerál, Dr. Longuinhos dos Santos, iha nia intervensaun agradese ba estrutura INCT ne’ebe mak iha inisiativa hodi elabora ona planu estratejiku hodi defini programa prerioridade sira. Nia mos sujere atu elabora tan Planu Estratéjiku ida hodi sai “sombrinha” ba planu ida ne’e. Atu termina, Prezidente Konsellu Jerál hamutuk ho membru sira deside aprova Plano Estratéjiku INCT ho karater alterasaun.
Iha sorin seluk, II Vise-Prezidente Konsellu Ezekutivu INCT, Dr. Augusto da Conceição Soares, iha nia aprezentasaun, informa katak, iha trimester ida ne’e INCT konsege ezekuta ona orsamentu ho total pursentu 70.24%, inklui obligasaun pursentu 82.32% ba iha programa Boa Governasaun no Jestaun Instituisionál no programa Edukasaun no Formasaun.
Partisipa iha reuniaun ne’e mak membru konsellu jerál sira, nomedamente Prezidente Konsellu Ezekutivu INCT, Dr. José Cornélio Guterres, I Vise-Prezidente Konsellu Ezekutivu INCT, Dr. Valentim Ximenes, Reitor Dìli Institute of Technology (DIT), Dr. Alvaro Menezes Amaral Ph.D, Dr. Vicente Paulo Correia, Dr. João Fernandes no tékniku sira hosi INCT no MESSK.