Díli, 10 Outubru 2022 – Estrutura másimu Institutu Nasionál Siênsia no Teknolojia (INCT, sigla iha Português), partisipa Audiênsia Públika ho Komisaun G Parlamentu Nasionál, iha instalasaun Parlamentu Nasionál.
Objetivu hosi Audiênsia Públika ne’e hodi diskute no presta esklaresimentu kona-ba apresiasaun ba ezekusaun Orsamentu Jerál Estadu (OJE) 2022 no Planu Orsamentu Jerál Estadu 2023 nian ba komisaun G, ne’ebé trata asuntu Edukasaun, Juventude, Kultura no Sidadania.
Prezidente Konsellu Ezekutivu INCT, Dr. José Cornelio Guterres, iha ninia intervensaun informa katak, iha tinan fiskál 2022, INCT hetan orsamentu ho totál Dollar Amerikanu $ 490,824.00 ba programa rua Boa Governasaun no Jestaun Institusionál no ida seluk mak Edukasaun no Formasaun. Nune’e trimestre datoluk ida ne’e, Institutu ezekuta ona 70,24% inklui ho ninia obligasaun 82,32%.
Iha tinan fiskál 2023, INCT hetan orsamentu Dollar Amerikanu $ 552,177.00, iha aumentu pursentu sanulu resin ida (11%), kompara ho tinan 2022. Orsamentu ne’e sei aloka ba programa Boa Governasaun no Jestaun Institusionál, ne’ebé konstitui ho ninia sub-programa haat (4) ho atividade neen (6) no programa Edukasaun no Formasaun, konstitui ho sub-programa ida (1) ho atividade tolu (3). Ho orsamentu ne’e, iha mos hanoin atu halo konstrusaun ba edifisiu INCT nian. Informa mos katak, Gabinete Primeiru-Ministru (GPM) halo kooperasaun ho INCT atu halo investigasaun hodi apoiu polítika Kadeia Valor, nune’e Ministériu Finansa (MF) aumenta orsamentu adisionál Dollar Amerikanu $ 75 000.
Audiênsia Públika ne’ebé hala’o mos ho Universidade Nasionál Timor-Lorosa’e (UNTL) no Institutu Politékniku Betanu (IPB) ne’e prezide hosi Prezidente Komisaun G Parlamentu Nasionál, Sr. António Verdial de Sousa, akompaña hosi Vise-Prezidente Komisaun G, Sra. Josefa dos Santos, distintu Deputadu sira no Estrutura INCT, II Vise Presidente Konsellu Ezekutivu INCT, Dr. Augusto Soares, Sekretaria Ezekutiva INCT, Dra. Maria Elsa Diogo Correia no Xefe Devizaun Planeamentu, Sr. Calistro Maria Correia.