Díli, 29 Setembru 2022 – Institutu Nasionál Siênsia no Teknolojia (INCT, sigla iha Português) realiza reuniaun Konsellu Sientífiku ba Dahitu ne’ebé prezide hosi Prezidente Konsellu Sientífiku, Dra. Ana Isabel de Fatíma Sousa Soares, iha instalasaun INCT, Balide.
Iha enkontru ne’e deskute pontu importante hanesan Aprezentasaun Planu Estratéjiku INCT, Aprezentasaun Relatóriu Atividade Sientífika INCT, Aprezentasaun 3° Trimestre Relatóriu Finanseiru no seluk-seluk tan.
Iha aprezentasaun, Investigadór Internasionál INCT, Dr. Filipe Couto, informa, esbosu final planu estratéjiku ne’e koalia kona-ba rekursu umanu, repozitóriu dijitál, Sentru Rede Internationál Standard Serial Number (ISSN), depózitu legál, investigasaun sientífika, publikasaun iha revista sientífika no seluk-seluk tan. Iha investigasaun sientifika ita difini área temátika sira, liña peskiza no projetu estudu sira. Nia mos hatutan tan katak, publikasaun rezultadu peskiza sientífika iha jornal nasionál INCT presiza kria editoriál nasionál ba siênsia iha Timor-Leste.
Iha sorin seluk, Xefe Departamentu Siência Sosiais no Umana, Dr. Leonel da Costa Xavier, aprezenta atividade ne’ebé Institutu hala’o hanesan anunsiu projetu peskiza sientífika tinan fiskál 2022, no hetan proposta submetida ho totál haat nulu resin haat (44), no ikus mai hetan proposta peskiza sanulu resin rua (12) ne’ebe aprovadu hodi kontinua halo investigasaun. Atividade seluk ne’ebé ita realiza hanesan estudu viabilidade kriasaun repózitori nasionál INCT, workshop kona-ba siênsia, teknolojia no inovasaun (STI) liu-hosi plataforma zoom-meeting no divulgasaun rezultadu peskiza sientífika tinan fiskál 2021 ba autoridade munisipiu sira, liña ministeriál sira inklui Parlamentu Nasionál.
Tuir II Vice-Prezidente Konsellu Ezekutivu INCT, Dr. Augusto da Conceição Soares, dehan, atu garante kualidade peskiza sientífika, INCT elabora guide line no estabelese ekipa hodi halo monitorizasaun ba referida peskiza. Atu termina, II Vise-Prezidente ne’e dehan, rezultadu hosi peskiza sira ne’e sei distribui ba iha autoridade Munisipiu sira nomos ministeiru relevante inklui Parlamentu Nasional hodi formula polítika públika sira.
Partisipa iha enkontru ne’e estrutura INCT no membru konsellu sientífiku, Dr. Estanislau Saldanha, Dr. Carla A. J. da Costa no Dr. Nilton Diamantino Paiva Mau.