Betanu, 26 Setembru 2022 – Prezidente Konsellu Ezekutivu Institutu Nasionál Siênsia no Teknolojia (INCT), Dr. José Cornélio Guterres, partisipa iha Serimónia Lansamentu Fatuk Dahuluk ba Edifísiu Foun Institutu Politékniku Betanu (IPB), iha aldeia Bee matan, suku Betanu-Manufahi.
Iha intervensaun, Sua Excelênsia Primeiru-Ministru (PM), Sr. Taur Matan Ruak informa katak, ida ne’e hanesan investimentu dahuluk ne’ebé boot iha nível edukasaun tamba VIII Governu Konstituisionál nia prioridade mak rekursu umanu, portantu presiza investe iha setor edukasaun. Tuir nia, país dezenvolvidu ida necesita rekursu umanu ne’ebé di’ak.
Alein ida ne’e, Primeiru-Ministru lori Governu nia naran hato’o agradesimentu ba Institutu Politéknik Bandung ba nia ajudu sira, agradese ba kooperasaun autoridade, komunidade no sira ne’ebé afeta diretamente ba projetu ida ne’e. Ikus liu, fó parabéns ba IPB tanba bele hetan investimentu privilejiadu ida ne’e.
Partisipa iha eventu ida ne’e mak Vise-Primeira Ministra no Ministra Soliedariedade Sosiál no Inkluzaun, Sra. Armanda Berta, Ministru Ensinu Superior, Siênsia no Kultura (MESSK), Dr. Longuinhos dos Santos, Dirijente sira husi Instituisaun Autónoma, Administradór Munisipiu Manufahi, Komandante Jerál PNTL, Autoridade Lokál sira, Profesór IPB, Estudante no Tékniku sira.