Díli, 11 Agostu 2022 – II Vise-Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português), Dr. Augusto Soares, hamutuk ho ekipa halo monitorizasaun ba peskiza sientífika kona-ba “A prevalência de Lombriga da Classe Trematode Fasciola spp nos Búfalos em Timor-Leste” ne’ebe lideradu husi Dr. Acácio Cardoso Amaral, iha Laboratório Nacional da Veterinary (LNV), Dili.
II Vise Prezidente Konsellu Ezekutivu INCT, Dr. Augusto Soares iha nia intervensaun hatete, antes ne’e ekipa hosi INCT halo ona monitorizasaun ba peskizadores sira hodi rekolla amostra feces hosi karau timur iha Munisípiu Baucau, Bobonaro no Manufahi. Nune’e, Partisipaun INCT nian iha Laboratório Nacional da Veterinary (LNV) atu observa direita teste ka diagnostika ba amostra feces nebe’e rekolladu ona hosi peskizador sira.
Dr. Acácio Cardoso Amaral hateten, amostra feces hosi karau timur ita rekolla hotu ona, agora ita tama iha faze ida ikus, maka ita atu teste ka diagnóstiku amostra feces refere iha laboratório ho nune’e ita bele komprova infeksaun lumbriga fasciola hepatica iha karau timur ka lae.
Peskizadór ne’e hatutan tan katak, prosesu atu halo diagnóstiku ba feces hosi karau timur iha laboratóriu primeiru ita tenki prepara amostra feces ne’ebe rekolladu ona iha plastik bag hodi halo diagnosa laboratoriu ho metodu sendimentasaun, depois tetu feces grama rua liu hosi balansu tau fali iha kontainer ka pot seluk, depois aumenta tan be 10 ml ba pot ka kontainer referida no supa sai be no aumenta Naoh turuk 3, hafoin aumenta tan be 10 ml no hein durante minutu 10, depois supa sai be no aumenta ho methyline blue turuk 2, hafoin amostra sei foti turuk 1-2 tau iha lamina de vidru no taka ho cover glass, hafoin ne’e hahu halo diagnostiku iha mikroskopia ho objetivu 10 X hodi identifika faciola hepatica ninia prezensa ka lae.
Peskiza ne’e hetan partisipasaun maximu hosi Xefe Departamentu Siénsia Exata no Siénsia Naturais, Sr. Gregório Rangel, Xefe Departamentu Etika, Sra. Jacinta dos Santos, Xefe Divizaun Administrasaun, Sr. Benjamin Cabeças no Estudantes Departamentu Saude Animal (UNTL).