Díli, 28 Juñu 2022 – II Vise-Prezidente Konsellu Ezekutivu Institutu Nasionál Siênsia no Teknolojia (INCT, sigla iha Português), Dr. Augusto Soares, partisipa iha semináriu ho tema “Kapasitasaun no Dezenvolvimentu Rekursus Humanus Nasionais” ne’ebé realiza hosi Fundu Dezenvolvimentu Kapitál Humanu (FDCH, sigla iha Português) ho objetivu hodi selebra loron Ensinu Superior no Loron Mundiál Siênsia ba dala XXI no aprezenta rezultadu estudu avaliasaun ba programa FDCH nian, hosi tinan 2015-2020.
Iha serimónia ne’e, II Vise-Prezidente hetan mos kna’ar hanesan Moderador ba sesaun aprezentasaun ba rezultadu estudu avaliasaun ba programa FDCH tinan 2015-2020. Iha nia intervensaun hatete, estudu avaliasaun ne’e realiza hosi INCT hamutuk ho investigadór rua, Dr. Afonso Almeida no Dr. Carlos de Deus no enumerador haat nulu (40), atu hodi hatene kona-ba progresu FDCH, dezafiu ne’ebé hasoru, liu-liu dezenvolvimentu rekursu umanu iha Timor-Leste.
Serimónia ne’ebé hala’o iha Delta Nova ne’e hetan partisipasaun hosi Sua Excelênsia Ministru Ensinu Superior Siênsia no Kultura, Dr. Longuinhos dos Santos, Reitor sira hosi Universidade, Diretor Jerál, Pontu fokál, koordenadór, Xefe Departamentu no tékniku sira.