Dili, 22 Jullu 2022 – Institutu Nasionál Siênsia no Teknolojia (INCT), halao sorumutu ho ekipa tékniku hosi Fundo de Desenvolvimento do Capital Humano (FDCH) ho objetivu atu koloka mellores graduadus naun bolseirus nain rua Sr. Domingos Mau Gonçalves no Sra. Feviana Soares de Jesus Marçal hodi halao sira nia Estajájiu Profesionál iha INCT durante fulan ne’en nia laran. Sorumutu ne’e prezide hosi II Vise-Prezidente Konsellu Ezekutivu INCT, Dr. Augusto Soares, iha sala enkontru INCT, Balide.
II Vise-Prezidente Konsellu Ezekutivu INCT, Dr. Augusto Soares, iha nia intervensaun hateten, INCT agradese ba FDCH bele organiza eventu ida ne’e hodi bele rekolla ita nia alin graduadus sira ne’ebe mellores graduadus sira hodi halo estajiu professional direita iha institusaun sira. Programa Estajiu Profesional ne’e diak tebes ba ita nia jovens sira tanba bele aumenta sira nia abilidade konesimentu pratíka iha fatin estajiu ba. INCT agradese tebes ba kolega estajiadu nain rua hosi FDCH ne’ebe mak haruka mai, maibe hosi parte INCT hato’o pedido ba FDCH husu estajiadu hamutuk nain ha’at hodi mai estajiu iha INCT, maibe mai nain rua talves sei mai tan, nebe’e ami hein katak koperasaun nebe’e husi INCT ho FDCH laos foin hahu hosi programa estajiu professional ne’e, maibe antes ne’e iha ona koperasaun iha parte seluk hanesan peskiza. Ami agradese tebes ba FDCH tanba bele simu ona ami nia pedido ba mellores estudante sira nebe’e atu mai estajiu iha institusaun ne’e.
II Vise Presidente ne’e hato’o mos Bemvindo ba estajiadu nain rua katak ita sei sai ekipa ida hanesan superteam ho imi nia prezensa bele kompleta ami no espera imi bele aprende buat ruma durante fulan ne’en estajiu iha INCT nune’e bele ganha imi nia esperensia relevante iha imi nia area.
Xefe Departamentu Relasaun Públiku Sr. Joanico Guterres hateten, ami agradese tebes ba INCT ne’ebe iha disponibilidade bele simu kolega estajiadu sira hodi estajiu iha institusaun ne’e. Hanesan II Vise Presidente INCT hateten ona, tuir los estajiada nain ha’at maka estajiu iha INCT tuir pedido ne’e be ami simu, ofisial rekursu umanus nain ida, ofisial administrasaun nain rua no ofisial lojistik ida, maibe numeru sira ne’e ami la konsege atinji tanba maioria mellores graduadus sira hetan ona servisu maski naran ita publika maibe sira ba deklara an servisu ona no balun saude ladun diak. Tuir los ami atu hodi estajiada nain tolu mak mai uluk iha etapa dahuluk, maibe ida ne’e lakonsege tanba hosi nain tolu ne’e ida moras, nune’e ami hodi uluk nain rua mak mai no seluk tan ami lista hela depois ami sei subtitui fali iha etapa daruak.
Sr. Joanico Guterres esplika tan estajiadu sira ne’e sei la taka dalan ba sira kuandu INCT loke vaga ruma sira bele aplika maski sira foin estajiu fulan ida ka rua tanba ita nia objetivu lolos ba estajiu professional mellores graduadus sira, atu lori sira ba iha merkadu de trabalho iha ita nia rai laran tantu institusaun governu no institusaun privadu ho ida nee lataka dalan ba sira atu servisu iha fatin ne’ebe deit.
Partisipa husi sorumutu ne’e Sekretaria Ezekutiva INCT Dra. Maria Elsa Diogo Correia, Chefe Devizaun Planeamentu no Rekursu Umanu, Sr. Calistro no Asistensia Tekníka ba Programa Estajiu Profesional, Sra. Desi Natalia.