Oecusse, 21 Juñu 2022 – Prezidente Konsellu Ezekutivu Institutu Nasionál Siênsia no Teknolojia (INCT), Dr. José Cornélio Guterres hamutuk ho I Vise-Prezidente Konsellu Ezekutivu INCT, Dr. Valentim Ximenes no Xefe Departamentu Siênsia Ezata no Siênsia Naturais INCT, Dr. Gregorio Rangel, hala’o sorumutu ho Prezidente Autoridade RAEOA, Dr. Arsénio Piaxão Bano ho nia estrutura hodi distribui rezultadu investigasaun sientífika tinan fiskal 2021 no asina Memorandu Entendimentu entre parte rua, iha salaun Administrasaun RAEOA.
Presidente Konsellu Ezekutivu INCT, Dr. José Cornélio Guterres, iha nia intervensaun agradese ba Prezidente autoridade RAEOA hodi aseita no realiza seremónia selebrasaun asina akordu servisu entre INCT ho RAEOA hodi legaliza servisu iha futuru, liu-liu iha área peskiza sira tanba INCT iha misaun prinsipal mak halo no promove investigasaun siéntifika. Ho nune’e, iha tinan 2022, INCT iha investigadór ne’ebé sei mai hala’o peskiza iha Oe-Cusse inklui mos zona fronteira seluk mak hanesan munisipíu Bobonaro, Covalima no Atauro.
Prezidente Autoridade RAEOA, Dr. Arsénio Paixão Bano, informa, kooperasaun ne’e importante tanba ne’e sei loke dalan ba servisu hamutuk entre RAEOA no INCT, loke dalan hodi halo investigasaun sientífika ba área sira ne’ebé mak RAEOA nesesita. Prezidente ne’e mos sujere atu halo peskiza kona-ba edukasaun tanba tinan ida ne’e iha planu atu hari sentru formasaun hodi fó apoiu ba profesor sira.
Partisipa iha enkontru ne’e dirijnte sira hosi INCT, estrutura RAEOA, administrador sira hosi sub-distritu, funsionáriu no tékniku sira.