Díli, 25 Maiu 2022 – Institutu Nasionál Siênsia no Teknolojia (INCT, sigla iha Português) hamutuk ho OACPS R& I PSF realiza enkontru final kriasaun estudu viabilidade Repozitóriu Dijitál Nasionál no Programa STI ho objetivu atu aprezenta relatóriu final hosi projetu rua ne’e. Enkontru ne’e hala’o liu-hosi plataforma zoom metting, iha sala enkontru INCT, Balide.
Presidente Konsellu Ezekutivu INCT, Dr. José Cornélio Guterres, iha nia intervensaun informa, iha fulan Marsu 2021, INCT halo ona kooperasaun ho peritu sira hosi Policy Service Facilities (PSF)-OACPS, atu halo estudu viabilidade kona-ba projetu rua ne’e. Repozitoriu Dijítal Nasionál ne’e rasik kria hodi depozita matéria sientífika sira, inklui disertasaun, jornál sientífiku no teze ho intuitu atu promove siênsia no kontribui ba dezenvolvimentu STI nune’e hodi formula polítika públika hodi dezenvolve siênsia no teknolojia iha Timor-Leste.
Estudu viabilidade ne’e hala’o durante fulan neen (6) hosi Organizasaun Africa Caribbean e Policy Service Facilities (PSF) no hetan finansiamentu hosi Uniaun Europeia (UE). Ohin entrega ninia rezultadu final ba INCT, atu nune’e, Instituto bele estabelese software Repozitório Dijitál Nasionál hodi depozita matéria sientífiku sira. Presidente hato’o mos agradesimentu ba peritu sira hosi Policy Service Facilities (PSF), Dra. Paula Morais, Dr. Ron Dekker, Sr. Amitav no Dr. Dionisio Babo.
Partisipa iha enkontru ne’e Assistant Secretary-General of the Department of Political Affairs and Human Development, Dr. Norbert Richard Ibrahim, Delegation of the European Union to Timor-Leste, Ambassador Andrew Jacobs, Embassy of Timor Leste in Brussels, Dr. João Noronha, Represent Minister of Tourism, Commerce and Industries, Dra. Maria Filomena Lay, Director General and Represent Minister of Higher Education, Science and Culture.