Díli, 17 Maiu 2022 – Institutu Nasionál Siênsia no Teknolojia (INCT, sigla iha Português) realiza enkontru Konsellu Sientífiku ba Daneen ho objetivu hodi aprezenta planu anual INCT no área temátika investigasaun sientífika tinan fiskal 2022. Enkontru ne’e prezide hosi Prezidente Konsellu Sientífiku, Dra. Ana Isabel de Fatíma Sousa Soares, iha sala reuniaun INCT, Balide.
Iha aprezentasaun, I Vise-Prezidente Konsellu Ezekutivu INCT, Dr. Valentim Ximenes, informa katak, área tematika investigasaun sientífika ne’e fahe ba parte tolu (3) hanesan área siênsia teknolojia, Inovasaun no Infrastruturas; siênsias sosial no umanu; siênsia Ezata no naturais. Hosi área sira ne’e ita fahe tan ba área tematika lima (5) hanesan inovasaun no infrastrutura; edukasaun, formasaun no inkluzaun sosial; ekonomia, agrikultura, turizmu no indústria; saúde no bem-estar; meiu ambiente, biodiversidade no alterasoens klimátikas. Nune’e, informa mos ba membru Konsellu Sientifiku katak, tinan ida ne’e INCT finansia projetu investigasaun sientífika hamutuk sanulu resin rua (12) ne’ebé mak aprovadu hosi painel júri sira ho total orsamentu Dolar Amerikanu rihun neen nulu ($ 60,000.00).
Segundu Prezidente Konsellu Sientífiku, Dra. Ana Isabel de Fatíma Sousa Soares, afirma katak, husu ba INCT hala’o projetu investigasaun sira ne’e ho responsabilidade masimu. Nia dehan atu Institutu halo kooperasaun ho sentru peskiza sira iha Timor-Leste, atu halo investigasaun ba área sira ne’ebé sei falta, hanesan saúde.
Iha sorin seluk, II Vise-Prezidente Konsellu Ezekutivu INCT, Dr. Augusto Soares, iha nia intervensaun hatete, INCT halo ona kooperasaun ho autoridade munisipiu sira ligadu ho liña investigasaun sira, ho nune’e, rezultadu hosi investigasaun ne’e, INCT sei disemina ba autoridade no komunidade sira, atu nune’e bele formula polítika no planu tuir rezultadu investigasaun sientífika.
Partisipa iha enkontru ne’e, estrutura INCT no membru konsellu sientífiku, Dr. Estanislau Saldanha, Dra. Carla A. J. da Costa no Dr. Nilton Diamantino Paiva Mau.