Díli, 10 Maiu 2022 – Institutu Nasionál Siênsia no Teknolojia (INCT, sigla iha Português) realiza Serimónia Asinatura Kontratu ba Atribuisaun Fundu Projetu Investigasaun Siêntifika INCT Tinan Fiskal 2022, iha salaun JL Villa, Fatuhada.
Objetivu hosi serimónia ne’e atu aprezenta “Padrões da Elaboração dos Relátorios de Investigação” hosi Dr. Felipe Couto, “Padrão da Ética de Pesquisa”, aprezenta hosi Xefe Departamentu Etika, Sra. Jacinta dos Santos Guterres, aprezentasaun “Manual da Execução de Pesquisa”, hosi Sekretária Ezekutiva, Dra. Maria Elsa Diogo Correia, no ikus liu, Asinatura Kontratu entre INCT no Investigador sira.
I Vise Presidente Konsellu Ezekutivu INCT, Dr. Valentim Ximenes iha nia intervensaun hatete, ohin ita konvida investigador nasionál ho total sanulu resin rua (12) ne’ebe mak aprovadu iha konkursu investigasaun sientífika iha Timor-Leste, atu atribui fundu hodi halo investigasaun tuir kalendáriu ne’ebé marka ona. Tinan ida ne’e, INCT atribui fundus hamutuk rihun hitu nulu resin lima $75.000 dolares ba investigador sanulu resin rua (12) no kada grupu hetan, dollar amerikanu rihun lima $5.000. Informa mos investigasaun ne’e importante tebes atu ajuda fornese dadus ba ita nia Governante, atu nune’e iha futuru bele formaliza polítika públika ne’ebé mak di’ak bazeia ba rezultadu investigasaun.
Reprezentante Investigador sira, Dra. Brigida A. Correia, agradese tebes ba oportunidade ne’e no promete sei halo investigasaun ho másimu responsabilidade no profisional. Maibe sujere mos ba responsável INCT no Ministériu relevante atu tau konsiderasaun ba atribuisaun fundus, tantu ba iha investigasaun esperimetal no la esperimental sira.
Partisipa iha enkontru ne’e Presidente Konsellu Ezekutivu INCT, Dr. José Cornélio Guterres, Diretora Jeral MESCC, Dra. Maria Filomena Lay Guterres, Membru Konsellu Jeral, Dr. João Fernandes, Investigador no funsionáriu INCT rasik.