Díli, 25 Abril 2022 – Dirijenti sira hosi Institutu Nasionál Siênsia no Teknolojia (INCT, sigla iha Português), simu bainaka hosi Universidade Warmadewa (UNWAR), hosi Bali no Institute of Business (IOB), Díli, ho objetivu hodi aprezenta proposta investigasaun hosi Q. A. Post Graduate Universidade Uarmadewa, Dr. I Made Mardika, ho tema “Dynamic Model of Tourism Development Comparison Study of Bali and Timor”. Estudu ne’e sei realiza hosi Universidade Warmadewa (UNWAR), Bali no Joint Research IOB.
Prezidente Konsellu Ezekutivu INCT, Dr. José Cornélio Guterres iha nia intervensaun, hatete, misaun prinsipál Institutu nian atu promove siênsia teknolojia no inovasaun iha Timor-Leste, liu hosi peskiza puru no aplikada. INCT mos halo ona kooperasaun ho LIPI Jakarta, UNESCO no Uniaun Europeia, ho intuitu atu promove investigasaun sira iha Timor-Leste.
Iha fatin hanesan, I Vise Reitor IOB, Sr. António Soares Martins, define INCT hanesan institusaun ida ho nia papel importante atu promove investigasaun, ho nune’e, IOB propôs aprezenta universidade UNWAR mai INCT, ho forma ida ne’e, iha futuru, bele koopera ho UNWAR tuir polítika Governu nian. Antes ne’e IOB ho Universidade Warmadewa Asina Nota Entendimentu kona-ba investigasaun iha área turizmu.
I Vise-Prezidente Konsellu Ezekutivu INCT, Dr. Valentim Ximenes, apela atu rezultadu hosi investigasaun tenke aprezenta mai iha INCT, tanba objetivu prinsipál Institutu nian mak promove siênsia teknolojia no inovasaun.
Dr. Augusto Soares, II Vise-Prezidente Konsellu Ezekutivu INCT, konsidera tema investigasaun relevante ho situasaun atual Timor-Leste. Nune’e, nia espera investigasaun ne’ebé sei hala’o hosi Universidade Uarmadewa, hamutuk ho IOB, bele fó rezultadu ne’ebé di’ak.
Partisipa iha sorumutu ne’e Investigador sira hosi Universidade Warmadewa, Assoc Prof. Dr. Putu Ngurah Suyatna Yasa, Assoc Prof. Dr. Drs. I Made Mardika, Assoc Prof. Dr. Ida Bagus Udayana Putra, Dr. I Made Suniasta Amertha no estrutura hosi IOB.